Ukrain siyasiy mabüsi Asan Ahtemov, onı Arhangelsk vilâyetiniñ Korâjma şeerindeki 5-nci müstemlekege etap etkenlerini bildirdi. O, karantinde buluna ve etap vaqtında hastalanğanını ayttı.
Qırım siyasiy mabüsiniñ ömür arqadaşı Repika Ahtemova Facebookta bunı bildirdi.
"Bugün, 2025 senesi saban ayınıñ 10-nda, Asan Zonatelekom hızmetinden telefon etip, onı Arkhangelsk vilâyetiniñ Korâjma şeeriniñ TM-5 binasına ketirgenlerini bildirdi. Şimdi karantinde, bir özü qala. Onıñ aytqanına köre, etap ağır edi, yolda hastalandı. Onıñ aqqında sorağan ve onıñ içün qasevetlengen er keske selâmlarını bildirmege rica etti", — dep yazdı o.
Ahtemov qardaşları aqqında ne bilemiz
Aziz ve Asan Ahtemovlar — qırımtatar faalcileridir.
2022 senesi berim ayınıñ 3 ve 4. künleri Aqmescitte ve Kezlevde beş qırımtatarı — iş adamı Eldar Odamanov, ağa-qardaşlar Aziz ve Asan Ahtemov, Şevket Üseinov ve Nariman Celâlovnı, Anğara köyünde gaz borusını patlatqanlarında şübeli sayılıp, tutuldı.
2022 senesi berim ayınıñ 6-nda işğalli "makeme", tutulğan qırımtatarlarnı apiske aldı.
2022 senesi berim ayınıñ 21-nde Qırımnıñ işğalli Yuqarı makemesi, Qırımtatar Milliy Meclisiniñ başınıñ muavini Nariman Celâl, vatandaş jurnalisti Asan Ahtemov ve onıñ qardaşı Aziz Ahtemovğa üküm çıqardı.
Asan Ahtemov 15 sene apis cezasını, 500 biñ ruble para cezasını aldı ve 1 sene devamında areket serbestligi sıñırlandı. Aziz Ahtemov 13 sene apis cezasını, 500 biñ ruble para cezasını aldı ve 1 sene devamında areket serbestligi sıñırlandı.
2023 senesi bozârğan ayda Qırımtatar Milliy Meclisiniñ başı Refat Çubarov, Aqmescit 2. SİZOnıñ memuriyeti Celâlov ve Ahtemov qardaşlarını maneviy ve fizikiy cezalandırğanını bildirdi.
2023 senesi orta küz ayınıñ başında Celâlov ve Ahtemov qardaşları Qırımdan Rusiye apishanesine etap etildi.
Telegram, WhatsApp ve Facebookta Suspilne Qırım haberlerine abune oluñız
