Kıyivdeki Dovjenko bağçasında açıq avada musafirlerni muzıka, yır, oyun, yarmalıq, tatlılar ve diger eglencelernen qarşıladılar, bundan ğayrı, Qırım cebesiniñ Ukrayina Arbiy Silâlı quvetleri içün para toplaşuvına qoltutuv içün auksion keçirildi.
Qırımtatar bayrağı künü nasıl keçkenini Suspilne Qırımnıñ haberinde oquñız.
Bu künniñ tarihiy emiyeti aqqında jurnalistlerge Qırımtatar Milliy Meclisiniñ reisi Refat Çubarov tarif etti.
"Bunıñ episi, epimiz Qırımnıñ azat etilmesine diqqatımıznı celp etmek içün yapıla. Qırımtatar bayrağı bugün mobilizatsiya rolüni daa yerine ketire. Ve er yerde, hususan, çetelde, er kes Ukrayinanı, Qırımnı, qırımtatarlarnı añlay. Mında cenk, işğal tarafından öz evlerinden quvulğan ve şimdi Qırımda olmağan insanlar bar, amma olar saqlanmağa tırışalar, olarnı qırımtatarı etken er şeyni saqlamağa tırışalar. Mında balalar biri-birinen tanış olsunlar, hatıralarnı paylaşsınlar ve kelecekke beraber olsunlar", — dep Çubarov tarif etti.
Tedbirge qırımtatar halqı içün meşur insanlar da keldiler. Arbiy hızmetçi ve rejissör Ahtem Seytablayev qırımtatar bayrağı oña küreşke ilham bere, dep tarif etti.
"Qırımtatar bayrağınıñ renkleri ukrayin bayrağınıñ renklerinen aynıdır. Ve bunıñ içinde bile büyük timsal bar. Halqımnıñ pek qıyın taqdiri bar ve o, ukrayin halqınıñ taqdirinen çoqusı ceetten bir-birine oşay. Bayraq — bu tek bir timsal degil, bu seni tanıtqan, seni ilhamlandırğan, kim olğanıñnı ve er kün ne yapmaq kerek olğanıñnı unutmamağa mecbur etken bir şeydir", — dedi Ahtem Seytablayev.
Hatırlatamız ki, bugün Kıyivdeki Mıhaylivska meydanında 5 ve 6 metr büyükliginde qırımtatar bayrağı açıldı.
Kün devamında Kıyevde ilk yaz ayınıñ 26 künü qayd etilgen resmiy olmağan Qırımtatar bayrağı kününe bağışlanğan bir qaç tedbir keçirildi. Kıyiv şeer memuriyeti, tış işler nazirligi, Taras Şevçenko adına Kıyiv Milliy universiteti ve diger müessiseler yanında altın tamğanen mavı bayraq dalğalanıp başladı. Bayraqlar Bulğaristan, Türkiye, Estoniya ve diger memleketlerniñ elçihaneleri ögünde köterildi.
Qırımtatar Maaliy Merkezi ise, ilk yaz ayınıñ 26 künü Qırımtatar milliy bayrağı kününiñ devlet seviyesinde resmen tanılmasına irişmek niyetinde olğanını bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
