Qırımtatar bayrağı Ukrayina Tış işler nazirliginiñ binası yanında devlet bayrağı yanında köterildi. Tedbir ilk yaz ayınıñ 26-nda qayd etilgen Qırımtatar bayrağı kününe bağışlandı.
Bugün qırımtatar bayrağı bütün dünyadaki Ukrayina elçihaneleri ögünde köterilecek, dep Ukrayina tış işler naziriniñ muavini Yevhen Perebıynis bildirdi, dep Suspilne Qırım mühbiri haber etti.
"Bugün, işğalge baqmadan, Rusiye işğaline qarşı küreşmege devam etken bütün qırımtatarlarğa teşekkür bildirmege isteyim. Bugün er yerde bulunğan bütün qırımtatarlarğa Rusiye istilâsı, Rusiye işğali aqqında kerçekni bildirmek içün elinden kelgenini yapqanları içün teşekkür bildirem. Qırımtatar Milliy Meclisiniñ reberligine iş ve kerçekni bildirmek içün yapqanları içün teşekkür bildirem. Ve, elbette, bugün Ukrayina mudafaa quvetleri saflarında devletimizni qorçalağan ve Rusiye işğaline qarşı küreşken qırımtatarlarğa da teşekkür bildirmege ister edim", — dedi o.
1917 senesi Bağçasarayda tasdıqlanğan ve 73 yıldan soñ ğayrıdan tiklengen qırımtatar halqınıñ bayrağı qırımtatar halqınıñ qırılmazlığınıñ timsali ola, dep Qırımtatar Milliy Meclisiniñ reisi Refat Çubarov ayttı.
"Qırımtatar bayrağı qırımtatar halqınıñ qırılmazlığınıñ, Qırımdan ayırılmazlığınıñ timsali ola —onı doğurğan, asırlar devamında devletçiliginiñ bar olğan toprağı. Qırımtatarlarnıñ Rusiye işğaline qarşı kütleviy çıqışları ve 2014 senesi kiçi-saban aylarında Ukrayina devletiniñ topraq bütünligine qol tutuvı sayesinde, qırımtatar bayrağı o vaqıttan berli halqara toplulıqta Qırımnen bağlı olğan er şeyniñ, Qırımnı işğalden qurtaruv küreşiniñ timsali oldı", — dedi o.
Qırımtatar bayrağı künü munasebetinen ukrayin ve qırımtatar cemiyetlerinen beraber Türkiyedeki Ukrayina Elçihanesinde bayraq köterildi, dep diplomatik müessiseniñ Facebook saifesinde bildirildi.
"Bu kün — basqı, sürgünlik ve işğalge baqmadan öz kimligini ve serbestlik ıntıluvını saqlağan halqnıñ küçü, itibarı ve qaviyliginiñ hatırlavıdır. Qırımtatar halqı — çoqmilletli Ukrayinanıñ ayırılmaz bir parçasıdır. Biz Rusiye istilâsına qatiyen qarşı çıqacaqmız. Çetel ortaqlarına, hususan Türkiyege, Ukrayinanıñ suvereniteti ve topraq bütünligine qol tutqanları ve qırımtatarlarnıñ aq-uquqlarını qorçalavğa diqqat ayırğanları içün minnetdarmız. Türkiyedeki qırımtatar ve ukrayin cemiyetleri — halqlarımız arasında dostluq ve añlaşuv köpüri ola", — dep öz çıqışında elçi Nariman Celâl qayd etti .
Bundan ğayrı, qırımtatar bayrağı Taras Şevçenko adına Kıyiv Milliy universitetiniñ yanında köterildi. Qırımtatar Milliy Merkeziniñ idare yolbaşçısı qayd etti ki, Ukrayinanıñ bu bayraqnı resmiy seviyede tanıması müimdir.
"Şunıñ içün biz añlamalımız ki, bu bayraq — bu küreş timsallerinden biridir, azatlıq içün küreş, mustaqilligimiz içün küreş, topraq bütünligi içün küreş. Ve kerçekten de, biz ümüt etemiz ki, ukrayinler içün tuvğan olğan bu bayraq resmiy olmalı, Ukrayinada resmen tanılmalı", — dedi o.
Hatırlatamız ki, Qırımtatar bayrağı künü — 2010 senesi qırımtatar halqınıñ temsil organlarınıñ teşebbüsinen başlatılğan resmiy olmağan bayramdır.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
