Qırımtatar Maaliy Merkezi Qırımtatar bayrağı kününi resmiy seviyede tanılmasına, qırımtatarlarnıñ bütün esas menlikleri ise — bayrağı, tamğası, gimni — Qırımnıñ resmiy timsalleri olaraq tanılmasına irişmek niyetinde olğanını bildirdi.
Ukrayina buhran media merkezinde keçirilgen matbuat konferentsiyasında spikerler bunı muzakere ettiler.
"Bayraq müimdir. Hususan cenk vaqtında o, tek bir kimlik timsali degil de, Rusiye tecavuzına, Qırım işğaline, umumen Rusiye imperializmine qarşılıq timsali ola. Qırımtatar bayrağı — serbestlik içün umumiy küreşimizniñ timsallerinden biridir", — dep Ukrayina Qavmiy siyaset ve vicdan serbestligi devlet hızmetiniñ raqamiy inkişaf meseleleri yolbaşçısınıñ muavini İğor Losovskiy ayttı.
Spikerler, cenk ve Qırım işğali şaraitinde milliy timsaller vastasınen qırımtatar kimliginiñ saqlanuvı ve populârlaşuvı medeniy qarşılıqnıñ müim şekli ve halqara seviyede qoltutuv aleti olğanını qayd ettiler.
"Milletlerniñ bayraqları köterilecek. Ve tek duşman halqnı ezse ve esir alsa, bayraqlar yoq ola bilir. Bugün Rusiye işğalcileri qırımtatar halqını bastırmağa tırışalar, çünki olar boysunmaylar. Amma işğal etilgen topraqlarda bile insanlar, canlarını telükege oğratıp, öz evleri yanında bayraqlarnı köterecekler — ve bu bizim qarşılığımıznıñ bir qısmı olacaq", — dep Qırımtatar Milliy Meclisiniñ reisi Refat Çubarov qayd etti.
QMMniñ İdaresiniñ reisi Eskender Bariiev, qırımtatar bayrağınıñ resmiy tanılması ve Bayraq kününiñ devlet seviyesinde qayd etilmesiniñ müimligini qayd etti.
"Ukrayinanıñ tamır halqları qanunı olarğa öz atributları ve timsalleri olmasına imkân bere. Şunıñ içün biz ilk yaz ayınıñ 26-sını Qırımtatar bayrağı künü olaraq resmen qayd etmege ve bayraqnı Qırımnıñ resmiy timsali olaraq qabul etmege çağıramız. Lâkin biz tanuv aqqında aytqanda, tek bayraq aqqında aytmaymız. Mesele bütün kimlik elementleri: tamğası, gimni, em de Qırımtatar Milliy Meclisini Ukrayinanıñ tamır halqınıñ temsil organı olaraq uquqiy tanuv esnasınıñ yekünlenmesinen bağlı. Bu, qırımtatar halqına birdemlik ve ürmetniñ kerçek bir areketi olacaqtır", — dedi Bariiev.
Qırımtatar Milliy Meclisini Ukrayina tamır halqınıñ temsiliy organı olaraq uquqiy tanuv esnasını yekünlemek kerekligi ayrıca qayd etildi.
Hatırlatamız ki, ilk yaz ayınıñ 26-nda qayd etilgen Qırımtatar bayrağı kününe körüşüv Kıyivde Oleksandr Dovjenko adına kinostudiyada keçirilecek.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
