Qırımtatar bayrağı kününe Kıyivdeki Mıhaylivska meydanında Knâğınâ Olğa abidesi yanında 5 ve 6 metr büyükliginde qırımtatar bayrağı açıldı.
Tedbir keçirilgen yerden Suspilne Qırım mühbiri bunı bildirdi.
Qırımtatar Milliy Meclisiniñ reisi Refat Çubarov bu bayraq 1917 senesi — Qırım Halq Cumhuriyeti ilân etilgende açılğanını hatırlattı.
"Bu bayraq endi azat etilecek soñ Ukrayina devlet bayrağınıñ yanında Qırımnıñ er köşesinde tiklengen Qırım muhtariyetiniñ timsali olaraq köterilmeli, bu da qırımtatar halqınıñ ukrayin devletiniñ terkibinde öz toprağında öz muqadderatını tayin etüv aqqınıñ yerine ketirüv şekli olacaq", — dedi o.
Medeniyet ve strategik kommunikatsiyalar naziriniñ muavini Ğalına Grıgorenko qayd etti ki, bu bayraq — adiy bir toquma degil, qırımtatar halqınıñ sabır timsalidir.
"O, qarşılıq ve sabırnıñ timsalidir. Altın tamğanen mavı bayraq. Kerçekten de, bayraqlarnı birleştirgen sarı-mavı renkler — Ukrayina devlet bayrağı ve qırımtatar halqınıñ bayrağı — birligimiz ve qırılmazlığımıznıñ timsalidir", — dep qayd etti o.
Hatırlatamız ki, Qırımtatar bayrağı künü — 2010 senesi qırımtatar halqınıñ temsil organlarınıñ teşebbüsi ile başlatılğan resmiy olmağan bayramdır.
Qırımtatarlarnıñ bayrağı — üst sol köşesinde akimiyet timsali olğan altın tamğanen mavı bayraqtır.
Mavı renk türk halqlarında temizlik ve serbestlik timsalidr. O, kök ve deñiznen bağlı, dep Suspilne Qırımğa tarihçı Gülnara Abdulayeva tarif etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
