Sevastopolda ruslar 6 milliard rublelik büyük şirketlerni "milliyleştirdiler"

İşğalli Qırım akimiyeti tarafından "milliyleştirilgen" Sevastopolnıñ (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adnıñ) eñ büyük işhaneleri arasında — "Sevastopolgaz", "Mayak" gemi ışıq tehnikası zavodı, "Plosk", "Tinos" işhaneleri, "Tehnotron" işletüv teşkilâtı, 1-nci tehnikiy işletüv merkezi, "Korpus" istisal kooperativi. Ruslar, bütün bu uquqiy ve fizikiy şahıslarnıñ mülkiyetini 6 milliard rublege (tahminen 2,5 milliard ğrıvnâ) qıymet kestiler.

Sankt-Peterburgda halqara iqtisadiy forumda Sevastopol (Aqyar) "gubernatorı" Mihail Razvojayev bunı bildirdi, dep TASS haber etti.

İşğalli akimiyet Ukrayina vatandaşları ve ecnebiylerniñ mülküni aluv "milliyleştirüv" olaraq adlandıra.

"Milliyleştirüv neticesinde şimdi hazinege berilgen obyektlerniñ kadastr qıymeti 6 milliard ruble (2,4 milliard ğrıvnâ — muar.) teşkil ete. Bu başlanğıç fiyatı, olarnı satsalar, kelir daa çoq ola bilir. Şimdi er bir obyektke dair qarar alamız, şeer hocalığı çerçivesinde bir şey daa semereli qullanıla bile", — dedi Razvojayev.

İşğalli Sevastopol (Aqyar) gubernatorı, 2024-2025 seneleri Rusiye Federatsiyası Ukrayina uquqiy ve fizikiy şahıslarğa ait olğan büyük şirketlerni "milliyleştirgeni"ni açıqtan bildirdi. Onıñ aytqanına köre, evel "Sevastopolgaz" müessisesi Ukrayina Silâlı quvetlerine yardım etken "ukrayin oligarhları"nıñ mülkiyetinde edi. Şimdi ise devlet şirketi "milliyleştirildi" ve "devlet mülkiyeti"ne keçti.

Bundan evel Suspilne Qırım bildirdi ki, işğalciler 2014 senesinden berli "milliyleştirüv"nen oğraşalar. Ticaretten ğayrı, olar yerli ealiden Qırımnıñ "sıñır zonaları"nda topraq damartılarını ve köy hocalığı içün topraq damartılarını aldılar. Şimdi Ukrayina vatandaşları ve çetel vatandaşları — Rusiye Federatsiyasınıñ vatandaşlığı olğanlardan ğayrı er kes, mülkiyetniñ bu türüne saip olmaqtan yasaqlana.

Umumen işğalli Qırım akimiyeti yarımadada Ukrayina vatandaşlarınıñ 4 biñden çoq şahsiy evini ve işhanesini qanunsız şekilde milliyleştirdi.

"Ukrainalı olmaq yeter" haberinde. Rusiye Federatsiyası mülküni "milliyleştirüv" dep adlandırıp, nasıl tutıp ala, Suspilne Qırım jurnalistleri uquqçılarnen laf etip, işğalciler yarımadada mülkiyetni zapt etkende ne yapmaq kerek olğanını añlattılar.

Читати ще