Umumen Qırımnıñ işğalli akimiyeti yarımadada Ukraina vatandaşlarınıñ 4 biñden çoq şahsiy evi ve işhanesini qanunsız şekilde zapt etti.
Prezidentniñ Qırım Muhtar Cumhuriyetindeki daimiy temsilcisi Olğa Kurışko saban ayınıñ 12-nde Bundestag vitse-prezidenti Katrin Göring-Ekardt ile körüşüvde bunı bildirdi.
"Bu, Qırımda Ukrainanıñ bütün izlerini yoq etüv siyasetiniñ neticesidir", — dep Kurışko Facebook saifesinde qoştı.
O, Almaniya parlamentiniñ vekiline, işğalli memuriyet yalıñız keçken afta daa 700 obyektniñ "milliyleştirilüvi" aqqında ilân etkenini bildirdi.
2024 senesiniñ soñunda Qırımtatar Milliy Meclisiniñ reisi işğalcilerniñ Qırımda Ukraina vatandaşlarınıñ mülkiyetini "milliyleştirüv" neticeleri aqqında bildirüvlerine izaat berdi, soñki eki yıl içinde olar ukrainlerniñ mülkiyetini 4,5 milliard rublege sattılar.
"Vaqtınca işğal etilgen Qırımda vatandaş ve uquqiy şahıslarnıñ mal-mülkiniñ milliyleştirüvi dep adlandırılğan şey, yarımadanı terk etken ve Rusiyeniñ Qırımnı işğal etüv ıntıluvlarına er türlü şekilde qarşılıq köstergen Ukraina vatandaşları ve şirketleriniñ mülküni aydutlar tarafından alıp taşlav usulından başqa bir şey degil", — dep qayd etti o.
Telegram, WhatsApp ve Facebookta Suspilne Qırım haberlerine abune oluñız
