Rusiye işğalli akimiyeti işğal etilgen Qırımnıñ "başı" Sergiy Aksönovğa ücüm azırlağanında qabaatlağan Oksana Şevçenko Rostov-na-Donu şeerindeki Cenübiy bölgeniñ arbiy makemesinde qabaatını tanıdı.
Bunı TASS Rusiye haber agentliginiñ mühbiri bildirdi.
Makemeciniñ qabaatını tanıma aqqında sualine cevap berip: "Qabaatımnı tolusınen qabul etem", dedi.
RİA "Novosti Krım", makemeniñ matbuat hızmetine atfı etip, oturış devam etkenini bildirdi.
Uquq qorçalayıcılarnıñ malümatına köre, Oksana Şevçenko yaqalanğan soñ Simferopolnıñ (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adniñ) 2-nci SİZO-sında tutuldı. Üç kişiniñ tutuluvınen videolar Rusiye kütleviy haber vastalarında aşkâr etildi. İşğalli matbuat vastalarınıñ vekilleri FSB tarafından çıqarılğan videonı tarqatıp, bu insanlar yarımadada terakt azırlağanını iddia ettiler. Uquq qorçalayıcı, "Qırım aq qorçalayıcı gruppasınıñ" idare reisi Olğa Skrıpnık bunı "dava"nıñ uydurılğanınıñ alâmetleri dep saya.
"Olar anda üçüniñ de apiske alınğanını köstergen teşviqat videosını deral yayınladılar. Bu da cinaiy davanıñ uydurılğanını köstere, çünki anda video levhaları berile, anda mahküm etüv, anda bu insanlar terroristik ücümni yapqan insanlar olğanını bildireler. Bu qabaatsızlıqtan qorçalav qaideleriniñ bozuluvıdır, ve siyasiy qısmı olğan bütün bu kibi davalarğa ait bir hususiyet ola", — Skrıpnık dedi.
Sergey Aksönovnı "öldürmege tırışuv" davası aqqında ne bilemiz
2025 senesi kiçik ayda Rusiye işğalcileri Sergey Aksönovğa qarşı suiqast azırlağanında qabaatlanğan Volodımır Ananyev, Volodımır Bodnar ve Oksana Şevçenkonı mahkemege berdi. İşğalli Qırım prokurorlığı dedi ki, ukrainler öz başına yapılğan patlayıcı alet yardımınen duşmannen işdeşlik yapqan Qırım sakininiñ maşinasını patlatmağa planlaştıra ediler.
Rusiye quvetçileriniñ malümatına köre, Bodnar Zaporijjâ vilâyetinden Qırımğa, Şevçenko kiralağan Simferopoldaki (Aqmescitteki) garaj qutusında saqlanğan patlayıcı aletni ketirdi. Qayd etilgenine köre, Aksönovnıñ marşrutını video nezareti kamerası vastasınen közetkenler.
2024 senesi kiçik ayda üçü de işğal etilgen Qırımda Rusiye FSBsiniñ hadimleri tarafından tutuldı. Olarğa qarşı "terroristik areketlerniñ azırlanuvı" ve "patlayıcı aletlerniñ qanunsız saqlanuvı" boyunca cinaiy davalar açıldı. Daa evel, saban ayınıñ 31-nde, Volodımır Bodnar da bu işte qabaatını tanıdı. Saban ayınıñ 3-nde mahkeme 75 yaşındaki Volodımır Ananyevniñ davasını baqtı.
Suspilne Qırım Volodımır Ananiyevniñ apayı, uquq qorçalayıcılar ve tanışlarınen subetleşip, Qırımnıñ eñ qart siyasiy mabüsiniñ "davası" aqqında tarif etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
