Qırımtatar Milliy Meclisi musulmanlarnıñ eñ büyük bayramlarından biri olğan Qurban Bayramı munasebetinen hayırlavlarnı derc etti. Muracaatta birlik, Qırım işğali şaraitinde menlikniñ saqlanuvı qayd etile, siyasiy mabüsler ve ukrayin arbiylerine qoltutmağa çağırıla.
Meclisniñ içtimaiy saifelerinde hayırlav derc etildi.
"Qırımtatar halqı içün Qurban Bayramı iman, fedakârlıq, merhamet ve birlik timsali olmaqtan ğayrı, milliy kimlik, til, medeniyet, tarih ve Vatanğa sadıqlıq saqlavnıñ müim bir faktorı ola", — dep aytıla muracaatta.
Hayırlav sözünde vaqtınca işğal etilgen Qırım, qırımtatarlarğa qarşı repressiyalar ve siyasiy mabüslerniñ azat etilmesi içün küreşke ayrı diqqat ayırıldı.
"Bu sene biz Qurban Bayramını Vatanımız olğan Qırımnıñ vaqtınca işğali şaraitinde qarşılaymız. Biñlernen qırımtatar evlerini terk etmege mecbur oldı, biñlernen insan repressiyalar, taqipler, tevqifler ve apis cezalarına oğradı. Qırımtatar halqı kene bölündi — tuvğan, amma işğal etilgen Qırımı, qıtaiy Ukrayina ve dünyanıñ bir çoq diger memleketi arasında. Amma tamır qırımtatar halqı öz menligini saqlay ve Qırımnı işğal etken ve Ukrayinanı yoq etmege tırışqan Rusiye duşmanına qarşı tura", — dep aytıla muracaatta.
Meclis, Rusiye işğalli akimiyeti tarafından siyasiy sebeplerden taqip etilgen qanunsız apiske alınğan Qırım sakinleri aqqında da hatırlattı.
"Dualarımız Kreml mabüsleri — Rusiye barbarları tarafından siyasiy sebeplerden azatlıqtan marum etilgen Qırım sakinleri içün de bar. Olarnı azat etmek içün ğayretimizni toqtatmaycaqmız", — dep Meclis qayd etti.
Hayırlavnıñ soñunda bütün Ukrayina musulmanlarına barışıq, aenk ve maneviy istiqrar tiledi, em de çoqusı musulman olğan ukrayin arbiylerine qol tuttı.
"Bu yıl Qurban Bayramınıñ qayd etilüvi er birimizniñ imanını daa da quvetleştirsin, qırımtatar halqınıñ aqları oğrunda küreş, siyasiy mabüsler ve qorantalarına qol tutuv, Ukraina havfsızlıq ve mudafaa quvetlerine yardım etüvdeki birdemligimizni quvetleştirsin. Er bir qorantağa tınçlıq, sağlıq, barışıq ve eyilik tileyik", — dep aytıla hayırlavda.
Hatırlatamız ki, bozarğan aynıñ 6-nda Kıyivdeki Nıvkı camisiniñ azbarında qırımtatarlar Qurban bayramını qayd etmek içün toplaştılar. O, acılıqnıñ yekünlengenini belgiley. Tedbirniñ teşkilâtçıları, hususan, Qırımtatar Milliy Meclisi ve Qırım musulmanları Diniy idaresi oldı.
Bundan evel Suspilne Qırım öz süjetinde Qurban Bayramınıñ timsali ve qırımtatarlar bayramğa nasıl azırlanğanı aqqında tarif etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
