Qırımtatar Milliy Meclisiniñ reisi Refat Çubarov, matbuat vastalarında AQŞ prezidenti Donald Trampnıñ işğal etilgen Qırımnı Rusiye toprağı olaraq tanıması aqqında bildirüvge cevap berdi. Hatırlatamız ki, Semafor neşiri öz menbalarına atıf etip, bu aqqında yazdı.
Svoboda Radiosınıñ canlı yayınında Çubarov hatırlattı ki, Trampnıñ birinci prezidentlik müddeti devamında AQŞ "Qırım beyannamesi"ni qabul etti, anda qayd etildi ki, Qoşma Ştatlar Rusiyeniñ Qırımnı işğal etmege ıntıluvını takbih ete ve bu siyasetini Ukraina topraq bütünligi ğayrıdan tiklenilmegence devam etmege vade ete.
"Men, AQŞnıñ buña qadar alıp barğan siyasetinen tam qarşı olğan bir şeyni red etem. Amma bu kibi yanaşmalar ola bilecegini aytsaq bile, bunı AQŞ devlet qurulışları, ilk evelâ Kongress, baqar. Şunıñ içün Amerika prezidentiniñ böyle bir şey yapacağını tüşünmeyim. Men bunı istisna etem", — dedi Refat Çubarov.
Hatırlatamız ki, saban ayınıñ 17-nde Semafor neşiri, AQŞ prezidenti Donald Trumpnıñ memuriyeti işğal etilgen Qırımnı cenkniñ toqtatıluvı aqqında añlaşma çerçivesinde Rusiye toprağı olaraq tanımaq imkânını baqa, dep bildirdi. Jurnalistler eki yüksek memurğa atıfta bulundılar.
Menbalarnıñ aytqanına köre, AQŞ Birleşken Milletlerge muracaat etip, böyle bir qarar almağa çağıra bile.
"Trampnıñ resmiy qararı daa yoq, Qırımnen bağlı ihtimal adım ise, onıñ memuriyeti cenkni toqtatmaq içün yollar qıdıruvında baqqan variantlardan biri ola", — dep aytıla haberde.
AQŞnıñ Milliy havfsızlıq şurasınıñ spikeri Brayan Gyuz Semaforğa bergen izaatında qayd etti ki, memuriyet "iç bir vade bermedi ve bu meseleni kütleviy haber vastaları vastasınen muzakere etmeycek".
"Eki afta evelsi Ukraina ve Rusiye ateş toqtatılması muzakerelerinde bir-birinden çoq kilometr mesafede ediler, şimdi ise prezident Trumpnıñ reberligi sayesinde añlaşmağa yaqınlaştıq. Maqsat deñişmey: öldürüvlerni toqtatmaq ve ziddiyetni barışıq yolunen çezmek", — dedi o.
Ukraina akimiyetiniñ bu beyanatlarğa reaktsiyası olmadı. Prezident Volodımır Zelenskıy, kiçik aynıñ 26 künü Qırımnıñ işğaline tirenüv künü munasebetinen, Qırımnıñ qanunsız zapt etilmesinen Ukrainağa qarşı Rusiye istilâsı başlağanını qayd etti.
Telegram, WhatsApp ve Facebookta Suspilne Qırım haberlerine abune oluñız
