Rusiye işğalcileri tarafından Noman Çelebicihan adına qırımtatar göñülli batalyonında iştirak etkeninde qabaatlanğan Qırım siyasiy mabüsi Rustem Virati, Rusiye taqiqat izolâtorında vefat etti. Tuvğanları cesedini almağa tırışalar, cenaze yarın olacaq.
Qırımtatar Milliy Meclisiniñ reisi Refat Çubarov bunı bildirdi.
"Onıñ qardaşı cesedini almaq içün ketti. Herson vilâyetiniñ Geniçesk rayonınıñ Rikov şeer şeklinde köyünde defin etilecek. İlk malümatqa köre, er şey vaqtında olsa, cenaze yarın olur. Er şey onı nasıl alıp ketkenlerine bağlı", — dep Çubarov bildirdi.
Onıñ aytqanına köre, ölüm şaraiti şimdilik ögrenile.
Qırımtatar Milliy Meclisiniñ bildirgenine köre, Herson vilâyetiniñ Geniçesk rayonınıñ sakini Rustem Virati, evinde bir çoq tintüv keçirilgen soñ, 2023 senesi baarde Rusiye işğalcileri tarafından tutulğan edi. O, 2015 senesinden başlap Qırımnıñ iqtisadiy qamaçavına yardım etkeninde ve Noman Çelebicihan adına Qırımtatar Milliy batalyonında iştirak etkeninde qabaatlandı.
Belli olğanı kibi, apiske alınğan soñ Rustem Viratti çoq işkencege oğratıldı ve pek köteklendi. Makeme oturışları qapalı şekilde keçti. Cezasından soñ — 8 yıl sert rejiminden soñ — başta Ufağa, soñra ise Ulyanovsk vilâyetiniñ Dmitrovgrad şeeriniñ tüzetüv müstemlekesine keitirildi, anda onıñ ölümi aqqında haber keldi.
2025 senesi kiçikniñ 10-nda qorantası mabüsniñ ölümi belli oldı, lâkin tam tarihı ve ölüm sebebi şimdilik belgilenmedi.
Telegram, WhatsApp ve Facebookta Suspilne Qırım haberlerine abune oluñız
