13 yılğa qanunsız olaraq maküm etilgen qırımtatar jurnalisti Asan Ahtemovnı Rusiyeniñ "Vladimirskıy tsentral" apishanesinden belli olmağan yerge etap ettiler.
Facebookta mabüsniñ ömür arqadaşı Repik Ahmetova bunı bildirdi.
Onıñ aytqanına köre, adam kiçikniñ 17-nde telefon etip, kiçik aynıñ 15-nde onı "Volodımır merkezi"nden Nijniy Novgorod şeerindeki 5-nci apishanege alıp ketkenlerini bildirdi.
"Bu müessisede ne qadar qalacağı belli degil. Bundan soñra ne alıp ketkenleri aqqında malümat yoq. Sağlıq vaziyeti - bir yıldır buğumları, ayaqları ve qolları ağıra. Suvuq olğanda, bu mesele daa sıq rastkele. Akimiyet merkezinde bulunğanda kerekli tibbiy yardımnı almadı", - dep qadın yazdı.
"Tribunal. Qırım epizodı"nıñ malümatına köre o, qara qış ayından berli etapnı bekley edi, çünki apishanede apis cezasını çekip, qalğan müddetini sert rejimli müstemlekede keçirecek edi.
"İşğal etilgen topraqtan tış cezalarnıñ çekilmesi halqara gumanitar uquq qaidelerine zıt kele. Apishanege etap etüv, işğal etilgen topraqta böyle cezalandıruv müessiseleriniñ olmaması ile añlatıla bile, amma Qırım tışında sert rejimli müstenlekege avuştırılsa, “b” noqtasıbıñ 8-inci qısmında arbiy cinayet alâmetleri olacaqtır: “işğal etilgen topraqnıñ ealisini bu topraqtan tış yerleştirüv”, —dep resurs bildirdi.
Asan Ahtemov ve onıñ kuzeni Aziz Ahtemov, "Tribunal. Qırım epizodı" yazdı ki, Qırımtatar Milliy Meclisiniñ birinci muavini Nariman Celâlnı apiske almaq maqsadınen ev gaz borusında diversiya aqqında uydurılğan cinaiy davanıñ iştirakçileri oldılar. Celâl 17 yıl, Asan Ahtemov 15 yıl, Aziz Ahtemov 13 yıl apis cezasını aldar. Keçken sene Nariman Celâlnı apisten boşatıp, Türkiyedeki Ukraina elçisi olaraq tayinlediler.
Nariman Celâl ve Ahtemov qardaşları aqqında ne bilemiz
Nariman Celâlov — 2016 senesi Rusiye tarafından "ekstremist teşkilât" olaraq tanılğan Qırımtatar Milliy Meclisiniñ başınıñ muavinidir. Aziz ve Asan Ahtemovlar — qırımtatar faalcileridir.
2022 senesi berim ayınıñ 3 ve 4. künleri Aqmescitte ve Kezlevde beş qırımtatarı — iş adamı Eldar Odamanov, ağa-qardaşlar Aziz ve Asan Ahtemov, Şevket Üseinov ve Nariman Celâlovnı, Anğara köyünde gaz borusını patlatqanlarında şübeli sayılıp, tutuldı.
2022 senesi berim ayınıñ 6-nda işğalli "makeme", tutulğan qırımtatarlarnı apiske aldı.
2022 senesi berim ayınıñ 21-nde Qırımnıñ işğalli Yuqarı makemesi, Qırımtatar Milliy Meclisiniñ başınıñ muavini Nariman Celâl, vatandaş jurnalisti Asan Ahtemov ve onıñ qardaşı Aziz Ahtemovğa üküm çıqardı.
Celâlov 17 senege üküm etildi, 700 biñ ruble para cezasını aldı ve 1,6 sene devamında areket serbestligi sıñırlandı.
Asan Ahtemov 15 sene apis cezasını, 500 biñ ruble para cezasını aldı ve 1 sene devamında areket serbestligi sıñırlandı. Aziz Ahtemov 13 sene apis cezasını, 500 biñ ruble para cezasını aldı ve 1 sene devamında areket serbestligi sıñırlandı.
2023 senesi bozârğan ayda Qırımtatar Milliy Meclisiniñ başı Refat Çubarov, Aqmescit 2. SİZOnıñ memuriyeti Celâlov ve Ahtemov qardaşlarını maneviy ve fizikiy cezalandırğanını bildirdi.
2023 senesi orta küz ayınıñ başında Celâlov ve Ahtemov qardaşları Qırımdan Rusiye apishanesine etap etildi.
2024 senesi bozarğan aynın 28. künü esir etilgenlerniñ deñişmesi çerçivesinde Ukraina, Nariman Celâlnı evge qaytardı.
Telegram, WhatsApp ve Facebookta Suspilne Qırım haberlerine abune oluñız
