Qara qış ayınıñ 27-nde Rusiyeniñ Moskva vilâyetindeki Vlasiha apellâtsiya arbiy makemesi "Hizb ut-Tahrir davası"nıñ üçünci Canköy gruppasınıñ mabüslerini apiste qaldırdı. Makeme oturışında Qırım siyasiy mabüsleri terroristik faaliyetinde iştirak etkenlerini ve Rusiye Federatsiyasınıñ anayasa tertibine qarşı areket etkenlerini red ettiler. Olar hronik hastalıqlar aqqında da haber ettiler.
Kreml mabüsleriniñ advokatları "Qırım birdemligi" cemaat teşkilâtına bunı bildirdi.
Dava iştirakçileriniñ bir qısmı Rostov-na-Donudaki 1-nci SİZOdan toplaşuvğa qoşuldı. Olar Ali Mamutov, Enver Halilâyev, Nariman Ametov ve Vohid Mustafayevdir.
Aynı zamanda Lobanovo köyündeki caminiñ sabıq imamı, ev tevqifi altında bulunğan 2-nci gruppa muddetsiz saqatı olğan siyasiy mabüs Remzi Kurtnezirov, alı fena olğanı içün oturışta iştirak etip olamadı.
Onıñ qorantası "Qırım birdemligi"ne bildirdi ki, soñki oturıştan soñ adamnıñ yürmesi qıyınlaştı ve o, şiddetli ağrılardan azaplana. Şimdi qırımtatarlarğa muntazam sürette ine urutıla.
Advokatlar şunı da qayd ettiler ki, Enver Halilâyev makemede eşitme zayıflığı ve SİZOda bulunğanı neticesinde sağlıq alı fenalaşqanını bildirdi. Amma makemeci, sağlıqları fenalaşqanına baqmadan, dava iştirakçileriniñ episiniñ tevqifini deñiştirmege red etti.
"Hizb ut-Tahrir davası"nıñ üçünci Canköy gruppası aqqında ne bilemiz
2024 senesi martnıñ 5-nde saba Qırımnıñ Bağçasaray ve Canköy rayonlarında Rusiye quvetçileri on qırımtatar adamınıñ evini tinttiler.
Aynı künü "makeme" dört qırımtatar faalcisini - Memet Lümanov, Aziz Azizov, Rustem Osmanov ve Mustafa Abduramanovnı yaqaladı. Olarnı 2024 senesi mayısnıñ 4-ne qadar 2. SİZOsına yolladılar.
Martnıñ 6-nda işğalli makeme 6 qırımtatar faalcisine tevqif tedbirlerini belgiledi. Sabıq imam Remzi Kurtnezirovğa ev apsi şeklinde tevqif tedbirini saylamaq qararı çıqarıldı. Amet Nariman, Ali Mamutov ve Arsen Kaşka, Enver Halilayev ve Vahid Mustafayevge işğalli mahkeme bu sene mayısnıñ 5-ne qadar SİZOda tutuv şeklinde tedbir aldı.
Er kesni "Hizb ut-Tahrir" islâm siyasiy firqasında iştirak etmege red eteler. Apiske alınğanlarnıñ çoqusı — çoq balalı babalardır.
Aqmescitniñ Kıyiv bölge makemesi çiçek ayınıñ 25-nde "Hizb ut-Tahrir davasınıñ" üçünci Canköy gruppasınıñ mabüslerini apiske almağa devam ettirdi. Olar Canköy ve Canköy rayonından qırımtatarlar - Enver Halillayev, Nariman Ametov, Ali Mamutov, faalci Arsen Kaşka ve Lobanovo köyündeki caminiñ imamı Vahid Mustafayev. Olar arman ayınıñ 3-ne qadar Aqmescitteki 2. SİZOda qalacaqlar.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız
