"Hizb ut-Tahrir davası"nıñ 12 yılğa maküm etilgen Qırım vatandaş jurnalisti Amet Süleymanov "Volodımır merkezi" apishanesinden apayına telefon etti. Bir buçuq yıl devamında oña telefon etmege izin berilmey edi.
Facebookta mabüsniñ apayı Lilâ Lumanova bunı bildirdi.
"Biz yalıñız 12 daqqa laf ettik, amma bu qısqa vaqıt içinde çoq şeyni muzakere ettik. Sağlığı aqqında aytıp berdi: yüksek basım ve bu şaraitte ameliyatnı beklemek — bu pek uzun bir ceryan", - dep o qayd etti.
Siyasiy mabüs balalar aqqında, ana-babasınıñ sağlığı aqqında soradı, soy-sop, dost ve qomşulardan haber aldı.
"Hususan tuvğan Qırım aqqında evini, tuvğan yerlerini ne qadar añlağanı aqqında sözleri deşetli edi. Bu 12 daqiqa bir daqiqa kibi keçti. Soñra o, er keske selâm ayttı... Qanunsızlıq ve adaletsizlik imkânlarımıznı sıñırlay ve bizni küçük şeylerge bile quvanmağa mecbur ete. Amma er şey yerine kelecek — aqiqat kelecek, yalan yoq olacaq, qabaatsızlar azat olacaq", — dep qırımtatar adamınıñ apayı ayttı.
Hatırlatamız ki, 2024 senesi orta küz ayınıñ soñunda Qırımnıñ işğalli Sağlıq nazirligi onı yürek klapanını deñiştirmek içün nevbetten alıp, beklev cedveline qoydı.
2024 senesi boş ayda onıñ apayı "Qırım birdemligi"ne aytqanına köre, hipertoniya krizi sebebinden Süleymanovnıñ burnundan daima qan aqa, başı sıq-sıq aylana, teren nefes alıp olamay. Kreml mabüsi bir ay devamında apayınıñ yollağanı ilâclarnı almağa tırışa edi.
Oña köz çilteriniñ angiopatiyası diagnozı qoyuldı. Bu köz çilteriniñ damarlarınıñ zararlanmasıdır, onıñ qan teminatı bozula. Hastalıq körlikniñ sebebi ola bile.
Amet Süleymanov aqqında ne bilemiz
Süleymanov – 2014 senesi Rusiyeniñ Qırımnı qanunsız işğalinden soñ evlerniñ tintilmeleri ve qırımtatarlarnıñ tutulmaları aqqında haber bergen "Qırım birdemligi" içtimaiy jurnalistidir.
O, qalpnıñ qırmızı qan damarı ve mitral kemligini çeke. Siyasiy mabüsniñ apayı Lilâ haber berdi ki, aqayı operatsiya nevbetinde tura. Bundan ğayrı, o qayd etti ki, onıñ içün apishanede bulunmaq, "ölüm demektir".
Bundan ğayrı, qırımtatarnıñ saqatlığı bar, amma 2015 senesi Moskvada ameliyattan red etkeni sebebinden o lâğu etildi, çünki muntazam tarzda teddaviylegeni Kıyivde ameliyat yapacaq edi.
2020 senesi saban ayınıñ 11-inde işğal etilgen Qırımnıñ Bağçasaray şeerinde rus quvetçileri, evini tinttiler ve neticesinde o tutuldı. 2023 senesi çiçek ayınıñ 5-ine qadar Süyelmanov, qalp hastalığı sebebinden, ev tevkifi astında buluna edi.
Qorçalayıcı tarafnıñ qırımtatarnıñ sağlıq alına dair çoq ilânlarına baqmadan, Rovtov-na-Donudaki Cenübiy bölge arbiy makemesi onı 12 senege maküm etmege qarar berdi.
Avropa Şurasınıñ Parlament Assambleyasınıñ (AŞPA) maruzacısı, rusiye akimiyetini qanunsız olaraq tevqif etilgen jurnalist Amet Süleymanovnı azat etmege çağırdı.
2023 senesi arman ayında onı Vladimirdeki 2-nci Rusiye apishanesi olğan "Vladimir merkezi"ne etap ettiler.
2024 senesi oraq ayında Rusiye Federatsiyasınıñ Vladimir vilâyet makemesi qırımtatarnıñ apishaneden azat etilüvini red etti, onıñ eki hastalığı olsa da, onı tüzetüv müessiselerinde tutmaq mümkün degil.
2024 senesi orta küz ayınıñ soñunda Qırımnıñ işğalli Sağlıq nazirligi onı yürek klapanını deñiştirmek içün ameliyat nevbetinden çıqardılar. Onıñ adı beklev cedveline kirsetildi.
Sağlıq nazirliginiñ işğalli vekilleri Süleymanovnıñ "ameliyatı aqqında qarar alınması içün mütenasip vesiqalarnen şahsen kelmesi"ni talap etti. Onıñ apayı Lilâ Lümanova Qırımnıñ işğalli prokurorlığına şikâyet yazdı.
Telegram, WhatsApp ve Facebookta Suspilne Qırım haberlerine abune oluñız
