67 qırım siyasiy mabüsi acele tibbiy yardımğa muhtac. Keçken sene Rusiye apishanelerinde tibbiy yardım kösterilmegeni sebebinden siyasiy sebeplerden apiske alınğan eki qırımlı elâk oldı.
Bu malümatnı ZMINA İnsan aqları merkezi berdi.
Uquq qorçalayıcılar "Ğafarov-Şıring cedveli"ni meydanğa ketirdiler, oña acele tedaviylevge muhtac olğan 21 siyasiy mabüs kirsetildi. Lâkin o vaqıttan berli vaziyet bayağı fenalaştı, ve cedvelde 67 insan bar.
Olarnıñ arasında – hronik hastalıqları, saqatlığı ve qart olğan insanlar, em de apishanelerde ağır sanitar şarait sebebinden azap çekken ya da ağır hastalıqlarğa oğrağanlar bar.
"Pek yaramay tutuluv şaraiti – suvuq ve sıcaq, sanitar ve mantar olmağan kameralar, yaramay aş, ilâc olmağan yerler – sebebinden tedaviylenmek imkânsızdır. Tedqiqat, umumen alğanda, Rusiye Federatsiyasınıñ apishaneler sisteması ukrain siyasiy mabüslerine kerekli tibbiy teminlev ve hızmetler bermey ya da bu ihtiyacnı körmemezlikke ura", – dep uquq qorçalayıcılar qayd ettiler.
"Cemaat teşviqatı, adliyecilerniñ işi ve tuvğanlarınıñ ğayretleri sayesinde bazı siyasiy mabüslerniñ vaziyeti biraz eyileşti: olarğa ilâclarnı bermege başladılar, diagnoznı tasdıqlamaq içün bazı tibbiy teşkerüvlerni keçirdiler, böylece olar kerekli tedaviylevni ala bileler. Amma, başqa taraftan, biz umumiy vaziyetniñ fenalaşqanını köremiz: tibbiy yardımğa muhtac olğanlarnıñ sayısı arttı, bazı siyasiy mabüsler kritik vaziyette buluna", – dep qayd etti ZMINA.
Şimdi eñ kergin vaziyet Tofik Abdulgaziyev, İrına Danılovıç, Oleksandr Sizikov ve Amet Süleymanov kibi siyasiy mabüslernen bağlı. Olarnıñ alı kritik, ve kerekli tedaviylev olmasa, vaziyet daa beter ola bilir.
Telegram, WhatsApp ve Facebookta Suspilne Qırım haberlerine abune oluñız
