Vladimir şeeriniñ Frunze rayon makemesi, 12 senege maküm etilgen qırım siyasiy mabüsi, yürek hastalığı olğan içtimaiy jurnalist Amet Süleymanovnı sağlıq alı sebebinden apishaneden azat etmege red etti. İmayeci, onıñ sağlığı Rusiye apishanesinde bulunmaq içün uyğun degil, dep bildire.
Süleymanovnıñ uquq imayecisi Lilâ Gemeciniñ sözlerine atıf eterek, Qırım birdemligi bu aqqında haber berdi.
"Bizim daa bir delilimiz, mabüsim Vladimirniñ 2. apishanesine avuştırılğan soñ, Federal Cezalar hızmeti (FSVP) tarafından qanunsız şekilde yapılğan tıbbiy teşkerüvniñ zıddiyetli olğanı edi. Tedqiqat qısmınıñ malümatı, kardiolog kibi ince mütehassıslar tarafından çıqarılğan hulâsalar, bu ekspertizanı imzalağan ekimlerniñ umumiy hulâsalarına qarşı ola", — dep Gemeci añlattı.
O qayd etti ki, mahsus mütehassıslar tarafından azırlanılğan hastalıqlarnıñ halqara tasnif kodlarına (HHTK) köre, apishanede bulunmağa imkân bermeycek hastalıqlarğa uyğun kele.
"Amet Süleymanovnıñ diagnozları ve teşkerüvlerinen bağlı başqa tibbiy hulâsalarnı mustaqil mütehassıs teşkilâtına yolladıq. O, imayeci tarafnıñ Süleymanovnıñ hastalıqları bar olğanına dair delillerini tasdıqladı. Amma makeme bunı körmemezlikke urdı", — dep uquq qorçalayıcı qayd etti.
Lilâ Gemeci qayd etti ki, makeme birinci instantsiya basamağında tibbiy hulâsa çıqarğan ekimlerniñ ve mustaqil ekspertizanı keçirgen makeme mütehassısınıñ sorğusını red etti. İmayeci taraf Frunze makemesiniñ qararına kassatsiyağa şikâyet bermege ve Federal Cezalar hızmetiniñ qanunsız tibbiy hulâsasını memuriy tertipte şikâyet etmege planlaştıra.
Uquq qoruyıcılarnıñ aytqanına köre, Ametniñ sağlıq vaziyeti apiske alınğanından berli pek fenalaştı. Oña yañı bir diagnoz qoyuldı - közniñ ağınıñ hipertonik angiopatiyası.
"Bu, yüksek basım sebebinden közleriniñ körme qabiliyetiniñ deñişkenini köstere. O, çoq vaqıt oqup olamay, yazıp olamay, közleri daima yaşlana. O, yatqan soñ burunında qaynağan qan ve qanlı yastıqnı tapqan edi. Oña kerekli tibbiy teşkerüv yapılmay, ilâclar berilmey, tek hastalıqlarınıñ alâmetleri yoq etile", — dep Gemeci añlattı.
Onıñ sözlerine köre, kardiolog ve revmatolog kibi kerekli hadimler olmağanı sebebinden Amet Süleymanovğa kardiolog tarafından tayinlengen bitsilin terapiyası berilmey. Bu tedaviylevni adam ömüriniñ soñuna qadar almalı.
Gemeci şunı da qayd etti ki, onıñ öz başına basımını ölçemek ve kerekli ilâclarnı almaq içün öz-özüni nezaret etüv kündeligine malümat yazmağa imkânı yoq edi. Amet, tez inkişaf etken ayaqları ve elleriniñ artrozı sebebinden kerekli yürüşlerge çıqarılmay.
"Böyle yanaşuvnen Ametniñ ömür müddeti pek qısqartıla. Şimdi ise eñ çoq beş senege yete bile. Amma, yaşayış keyfiyetiniñ bozulmasınen beraber, müddet daa tez bite bilir. Biz Ametniñ azat etilmesi içün er şey yapacaqmız", — dep Lilâ Gemeci hulâsa çıqardı.
Amet Süleymanov aqqında ne bilemiz
Süleymanov – 2014 senesi Rusiyeniñ Qırımnı qanunsız işğalinden soñ evlerniñ tintilmeleri ve qırımtatarlarnıñ tutulmaları aqqında haber bergen "Qırım birdemligi" içtimaiy jurnalistidir.
O, qalpnıñ qırmızı qan damarı ve mitral kemligini çeke. Siyasiy mabüsniñ apayı Lilâ haber berdi ki, aqayı operatsiya nevbetinde tura. Bundan ğayrı, o qayd etti ki, onıñ içün apishanede bulunmaq, "ölüm demektir".
Bundan ğayrı, qırımtatarnıñ saqatlığı bar, amma 2015 senesi Moskvada ameliyattan red etkeni sebebinden o lâğu etildi, çünki muntazam tarzda teddaviylegeni Kıyivde ameliyat yapacaq edi.
2020 senesi saban ayınıñ 11-inde işğal etilgen Qırımnıñ Bağçasaray şeerinde rus quvetçileri, evini tinttiler ve neticesinde o tutuldı. 2023 senesi çiçek ayınıñ 5-ine qadar Süyelmanov, qalp hastalığı sebebinden, ev tevkifi astında buluna edi.
Qorçalayıcı tarafnıñ qırımtatarnıñ sağlıq alına dair çoq ilânlarına baqmadan, Rovtov-na-Donudaki Cenübiy bölge arbiy makemesi onı 12 senege maküm etmege qarar berdi.
Avropa Şurasınıñ Parlament Assambleyasınıñ (AŞPA) maruzacısı, rusiye akimiyetini qanunsız olaraq tevqif etilgen jurnalist Amet Süleymanovnı azat etmege çağırdı.
Telegram ve Facebookta Suspilne Qırım haberlerine abune oluñız
