Ukraina Mudafaa nazirliginiñ Baş istihbarat idaresiniñ yolbaşçısı Kırılo Budanov ilk qış ayınıñ 31-nde işğal etilgen Qırım yanında Qara deñizde Rusiye Mi-8 arbiy vertolötınıñ Magura V5 deñiz dronı tarafından eñ yañı R-73 SeeDragon raketalarınıñ vastasınen yoq etilmesini "kerçekten de tarihiy operatsiya" dep adlandırdı.
O, ''Yedıni novını'' ("Birleştirilgen haberler") telemarafonınıñ canlı yayınında bunı bildirdi.
"Bu kerçekten de tarihiy bir ameliyat, dünya tarihında ilk sefer oldı. Evel bizler bir qaç kere Rusiye ava maqsadlarına ücümler vaqtında olarnı urıp tüşürdik, amma urıp tüşürilgen soñ olar yalı boyuğa, bazıları ise ava limanlarına qadar yetip oldılar. Bugün birinci kere vertolötnı urdıq — o, suvğa tüşti. Yani Qara deñiz üzerinde ava maqsadınıñ yoq etilmesi qayd etildi", — dedi Budanov.
Hatırlatamız ki, ilk qış ayınıñ 31-nde Ukraina istihbaratınıñ "Group 13" mahsus bölügi işğal etilgen Qırımnıñ Tarhan Qut burnu yanında Rusiyeniñ Mi-8 arbiy vertolötını yoq etti. Daa bir Rusiye vertolötı zarar kördi, lâkin o, baza uçaq limanına irişip oldı.
Bundan da ğayrı, Ukraina Mudafaa nazirliginiñ Baş İstihbarat idaresi, Magura V5 deñiz dronından raketanen urulğan Rusiye Mi-8 vertolötınıñ uçucısınıñ radio itiraflarını aldı. O, ücüm vaqtını ve vertolötınıñ ciddiy zarar körgenini tarif etti.
Telegram, WhatsApp ve Facebookta Suspilne Qırım haberlerine abune oluñız
