Ukraina prezidenti Qırımtatar Milliy Meclisi reisiniñ birinci muavini Nariman Celâlnı Türkiyedeki Ukrainanıñ yañı elçisi olaraq tayin etecek.
Volodımır Zelenskıy ilk qış ayınıñ 20-nde aqşam çıqışta bulunıp bunı ayttı.
"Bugün diplomatik taqımımıznen yañı Ukraina elçileriniñ cedvelini tasdıqladıq. Men 30dan çoq qararnı qabul ettim, olarnıñ arasında Nariman Celâl — Türkiyege, Alöna Üetmançuk — Ukrainanıñ NATO temsilcisi, Andriy Melnık — BMdeki Ukraina temsilcisi. Bu ve başqa emirler — yaqın kelecekte, diplomatik protseduralarğa köre", — dep bildirdi Ukraina prezidenti.
İşbu tayinlevden evel Suspilne Qırım Nariman Celâl ve Leniye Umerovanıñ körüşüvini teşkil etti. Bu subet vaqtında Celâl ukrain aqiqatını dünyağa yetkizmek kerekligi aqqında da ayttı.
"Siyasiy mabüslerniñ azat etilüvini talap etmege ketkende, er şey aqqında aytmağa mecbursıñ. Ve cenk ve onıñ sebepleri, ve ukrainler ne içün teslim olmayıp, cenkleşmege devam etkeni aqqında. Men Türkiyede böyle bir tecribe keçirdim, adiy Türkiye vatandaşları, olar soraylar: "Ne içün cenkleşesiñiz? Kerçekten de, eki büyük devlet — Amerika Qoşma Ştatları ve Rusiye — biri-birine qarşı. Ve siz olarnıñ arasında bulunğan ediñiz. Ve bunı añlatmaq kereksiñiz. Tamam, deyim ki, biz global bir zıddiyet olğanını añlaymız, amma, bağışlañız, bizge küreşmege kelgenler Amerika askerleri degil, aksine, de olar yardım eteler, bizge küreşmege kelgenler ise — ruslardır. Ve siz bizge ellerimizni birleştirmege teklif etesiñizmi? Ve böyle adiy, sanki ukrainlerniñ çoqusı içün añlayışlı şeylerni añlatmaq kerek", — dedi Celâl.
Bütün subetni yarın saat 17:00-da Suspilne Qırımnıñ YouTube kanalında seyir etmek mümkün olacaq.
Ahtemov qardaşları aqqında ne bilemiz
Aziz ve Asan Ahtemovlar — qırımtatar faalcileridir.
2022 senesi berim ayınıñ 3 ve 4. künleri Aqmescitte ve Kezlevde beş qırımtatarı — iş adamı Eldar Odamanov, ağa-qardaşlar Aziz ve Asan Ahtemov, Şevket Üseinov ve Nariman Celâlovnı, Anğara köyünde gaz borusını patlatqanlarında şübeli sayılıp, tutuldı.
2022 senesi berim ayınıñ 6-nda işğalli "makeme", tutulğan qırımtatarlarnı apiske aldı.
2022 senesi berim ayınıñ 21-nde Qırımnıñ işğalli Yuqarı makemesi, Qırımtatar Milliy Meclisiniñ başınıñ muavini Nariman Celâl, vatandaş jurnalisti Asan Ahtemov ve onıñ qardaşı Aziz Ahtemovğa üküm çıqardı.
Asan Ahtemov 15 sene apis cezasını, 500 biñ ruble para cezasını aldı ve 1 sene devamında areket serbestligi sıñırlandı. Aziz Ahtemov 13 sene apis cezasını, 500 biñ ruble para cezasını aldı ve 1 sene devamında areket serbestligi sıñırlandı.
2023 senesi bozârğan ayda Qırımtatar Milliy Meclisiniñ başı Refat Çubarov, Aqmescit 2. SİZOnıñ memuriyeti Celâlov ve Ahtemov qardaşlarını maneviy ve fizikiy cezalandırğanını bildirdi.
2023 senesi orta küz ayınıñ başında Celâlov ve Ahtemov qardaşları Qırımdan Rusiye apishanesine etap etildi.
Telegram, WhatsApp ve Facebookta Suspilne Qırım haberlerine abune oluñız
