Qırımtatar Milliy Meclisiniñ reisiniñ birinci muavini Nariman Celâl işğal etilgen Qırımda qırımtatar mebuslarınıñ sözde qurultayınıñ keçirilmesini tenqit etip, onı qanunsız dep adlandırdı.
O, Facebooktaki videosında bunı bildirdi.
"Tünevin Qırımda qırımtatar halqınıñ "sesi"ni teşkil etmege daa bir ıntıluv oldı, qırımtatar mebuslarınıñ qurultayı teşkil etildi, onıñ maqsadı — qırımtatarlar işğalden memnün olğanını, olar Rusiyede yaşamağa istegenini ve işğal etilgen Qırımda endi 11 yıl devamında yüz bergen yaramay şeylerni körmegenini bildirmek edi", — dedi Celâl.
Birinciden, işğal şaraitinde demokratik saylavlar aqqında söz yürsetilmey. İşğalli akimiyetniñ malümatına köre, Qırımdaki soñki saylavlarda, zorbalıq usulları qullanılğanına baqmadan, ealiniñ tek 47%-i iştirak etti.
Ekinciden, işğal etilgen Qırımda er bir yerli mebus ayrı bir halqnı degil de, çoqmilletli cemiyetni temsil ete. Celâlnıñ aytqanına köre, böyle mebuslar qırımtatarlarnıñ adından laf ete bile degen iddialar esassızdır.
Üçünciden, 2013 senesi demokratik printsipler boyunca saylanğan Meclis ve Qurultay qırımtatarlarnıñ yekâne temsil organları olıp qala. İşğal başlağan soñ olar Ukrainanıñ topraq bütünligini qorçalaylar.
"Qırımtatarlar demokratik, serbest, adaletli, idare etilgen Qırımda yaşamağa isteyler, ve qırımtatarlar Ukraina vatandaşları olalar, ve bu, mecburiy Rusiye vatandaşlığından farqlı olaraq, olarnıñ öz saylavı edi. Bunı bütün dünya bile, qırımtatar halqı bile", — dep qayd etti Celâl.
Hatırlatamız ki, Qırımda Rusiye işğalli akimiyeti tarafından teşkil etilgen qırımtatarlarnıñ qurultayı olıp keçti. Tedbirniñ iştirakçileri, hususan BMniñ Havfsızlıq Şurasına ve Türkiye parlamentine bir sıra muracaatlarnı qabul ettiler. Qırımtatar Milliy Meclisiniñ reisi Refat Çubarov bildirdi ki, Qırımdaki "qırımtatarlarnıñ qurultayları"nıñ esas maqsadı — tamır halqınıñ kerçek vekillerini halqara seviyede itibardan tüşürmektir.
Telegram, WhatsApp ve Facebookta Suspilne Qırım haberlerine abune oluñız
