1948 senesi ilk qış ayınıñ 9-nda BMBirleşken Milletlerniñ Baş assambleyası genotsid cinayetiniñ ögüni aluv ve cezasını berüv şartnamesini qabul etti. Halqara genotsid fedalarını añma kününde Qırımtatar Milliy Meclisi Rusiye Federatsiyası ve onıñ vatandaşlarını cenk vaqtında yapılğan cinayetleri içün mesüliyetke çekmege çağırdı.
Bunı Telegramda Qırımtatar Milliy Meclisiniñ reisi Refat Çubarov yazdı.
"Halqara genotsid cinayetleriniñ fedalarını añma kününde halqara toplulıqnı Rusiyeni Ukrainağa qarşı açqan cenkini toqtatmasına ve bu cenkte cinayet yapqan Rusiye ve onıñ vatandaşlarını mesüliyetke çekmesine çağıralar", — dep bildirildi.
Çubarov şunı da qayd etti ki, Meclis qırımtatar halqınıñ 1944 senesi mayıs ayınıñ 18-nde zorbalıqnen sürgün etilmesini, genotsid aktınıñ resmen tanınması içün çalışmağa devam etecek.
Hatırlatamız ki, 2022 senesi çiçek ayınıñ 14-nde Ukraina Yuqarı Şurası oturışında Rusiye ordularınıñ Ukraina toprağına istilâsı vaqtında yapqan areketlerini genotsid olaraq tanıdı.
Qırımtatar halqınıñ sürgünligini genotsid olaraq bir qaç memleket tanıdı: Ukraina — 2015 senesi, Litvaniya ve Latviya — 2019 senesi, Kanada — 2022 senesi, Lehistan ve Estoniya — 2024 senesi.
Telegram, WhatsApp ve Facebookta Suspilne Qırım haberlerine abune oluñız
