15 senege maküm etilgen qırımtatar Asan Ahtemov, Rusiyeniñ "Vladimir merkezi" 2-nci apishanesinde körme qabiliyetini coya. Sağlam tişler de aman-aman qalmadı — episi yıqıldı ya da öz-özünden tüşti. Aynı zamanda onı tadaviylemeyler.
İlk qış ayınıñ 5-nde, Asannıñ 35-inci doğğan kününde onıñ apayı Repika Ahtemova Qırımtatar maaliy merkezine bunı bildirdi.
Onıñ aytqanına köre, siyasiy mabüs apishaneniñ tsehinde çalışa. O, işhanede bulunğan vaqıt, makümler içün tükândan sipariş etilgen qurabiyenen qave ve çay içe bile.
Amma aş meselesi bar, çünki aş qısqa, ve sıq-sıq tavuq ya da balıq aşları berile. Diniy baqışları sebebinden Ahtemov domuz etini aşamay, şunıñ içün digerlerinden az aşay.
Aynı zamanda, yarıqsızlıq ve devamlı oquştan körme qabiliyeti tüşti, şimdi pek yaramay köre. Bu yıl onıñ tizleri, buğumları ağırmağa başladı.
"Onı kimse tedaviylemey. Em de tibbiy yardım içün muracaat etmek — kerçekten de, siñirlerniñ manasız ğayıp olmasıdır. O yerde bu pek qıyın. Sağlam tişler aman-aman qalmadı — episi yıqıldı ya da öz-özünden tüşti", — dey Ahtemovnıñ apayı.
O, Asanğa er afta mektüpler yaza, cevaplar olmasa da, üç-dört aftada bir kere kelir. Oraq ayında üç künlik körüşüvden evel, yıl içinde bir kere telefon açtı.
"Biz (körüşüvde — muar.) qave içtik, laf ettik, amma bu künler pek tez keçti. Asan er vaqıt olğanı kibi yahşı ve quvançlı edi... Menim içün Asan, muqavemetniñ timsali oldı. Men aqayımnen ğururlanam. O, em esirlikte, em de azatlıqta olğanlar içün bir örnektir", — dep tarif etti Repika Ahtemova.
Qorantası onıñ küreşini birinci kününden destekley, dep yazdı Qırımtatar maaliy merkezi. Ahtemovlarnıñ eki balası bar: 10 yaşında oğlu Refat ve 6 yaşında qızı Safika.
"Refat babasınıñ bulunğan yerini bile ve babası bir şey yapmağanını añlay. O, Asannıñ deñiştirilmesini bekley. Küçük Safikağa ise, babamıznıñ çalışqanını aytamız. Ana-baba qayğıruvı ve sevgisi olmasa, balalarğa pek qıyın olur, men de bunı añlayım", — dep qayd etti siyasiy mabüsniñ apayı.
Hatırlatamız ki, 2024 senesi boş aynıñ soñunda Rusiye makemesi qırımtatar faalcileri, qırılım qardaşlar Asan ve Azize Ahtemovlarnıñ 13 ve 15 senelik apis cezasını deñiştirmemege qarar aldı. Olarnı Perevalne (AnğaraRusiye imperiyası ve Soviet Birligi tarafından Qırımnıñ meskün yerleriniñ adlarını deñiştirüv islâatından evelki ad) köyünde gaz borusında "diversiya"da qabaatlaylar.
Bundan da ğayrı, bu sene arman ayında Asan Ahtemovnıñ ömür arqadaşı, aqayınıñ közleri ve tişleri bozulğanını bildirdi.
Nariman Celâl ve Ahtemov qardaşları aqqında ne bilemiz
Nariman Celâlov — 2016 senesi Rusiye tarafından "ekstremist teşkilât" olaraq tanılğan Qırımtatar Milliy Meclisiniñ başınıñ muavinidir. Aziz ve Asan Ahtemovlar — qırımtatar faalcileridir.
2022 senesi berim ayınıñ 3 ve 4. künleri Aqmescitte ve Kezlevde beş qırımtatarı — iş adamı Eldar Odamanov, ağa-qardaşlar Aziz ve Asan Ahtemov, Şevket Üseinov ve Nariman Celâlovnı, Anğara köyünde gaz borusını patlatqanlarında şübeli sayılıp, tutuldı.
2022 senesi berim ayınıñ 6-nda işğalli "makeme", tutulğan qırımtatarlarnı apiske aldı.
2022 senesi berim ayınıñ 21-nde Qırımnıñ işğalli Yuqarı makemesi, Qırımtatar Milliy Meclisiniñ başınıñ muavini Nariman Celâl, vatandaş jurnalisti Asan Ahtemov ve onıñ qardaşı Aziz Ahtemovğa üküm çıqardı.
Celâlov 17 senege üküm etildi, 700 biñ ruble para cezasını aldı ve 1,6 sene devamında areket serbestligi sıñırlandı.
Asan Ahtemov 15 sene apis cezasını, 500 biñ ruble para cezasını aldı ve 1 sene devamında areket serbestligi sıñırlandı. Aziz Ahtemov 13 sene apis cezasını, 500 biñ ruble para cezasını aldı ve 1 sene devamında areket serbestligi sıñırlandı.
2023 senesi bozârğan ayda Qırımtatar Milliy Meclisiniñ başı Refat Çubarov, Aqmescit 2. SİZOnıñ memuriyeti Celâlov ve Ahtemov qardaşlarını maneviy ve fizikiy cezalandırğanını bildirdi.
2023 senesi orta küz ayınıñ başında Celâlov ve Ahtemov qardaşları Qırımdan Rusiye apishanesine etap etildi.
2024 senesi bozarğan aynın 28. künü esir etilgenlerniñ deñişmesi çerçivesinde Ukraina, Nariman Celâlnı evge qaytardı.
Telegram, WhatsApp ve Facebookta Suspilne Qırım haberlerine abune oluñız
