İşğalciler tarafından Aqmescit civarındaki gaz borusını patlatqanı içün 15 senege maküm etilgen qırım siyasiy mabüsi Asan Ahtemovnıñ Vladimir vilâyetiniñ Vladimir merkezi olaraq belli olğan 2. apishanesinde, tişleri ve közleri bozula.
Onıñ apayı Repika Ahtemova Facebook saifesinde bunı bildirdi.
O, oraq ayınıñ soñunda aqayınen uzun müddetli körüşüvde körüşti, amma olarğa bu körüşüvge tek ekinci kere izin berildi. Qadınnıñ aytqanına köre, oña tibbiy yardım kösterilmey, onıñ içün sağlığını özü baqa. Şimdilik siyasiy mabüsniñ sağlıq vaziyeti "daa yahşı".
"Düzenli beslenme ve vitaminler olmağanı içün tişleri boza. Boş vaqtında pek çoq oquy ve kamerasında az ışıq olğanı sebebinden körmek qabiliyetini coya. Közler içün vazife yapıp, raatlanmağa tırışa, amma körmek qabiliyetini coyğanını duya. Apishaneniñ şaraiti, elbette, sert. Pek zor olğanına baqmadan, öz aqları içün sıq sıq küreşmek mecbur", — dep Ahtemova yazdı.
O şunı da ayttı ki, Asan paketleme hanesinde çalışa ve aftada bir raatlıq künü bar. Boş vaqtında oquy ve mektüplerge cevap bere.
"Umumen, (Asannıñ — muar.) keyfiyeti yahşı. O, dayanıp qala, ruhu bozulmadı. Yaqın, tanışları ve oña iç tanış olmağanlarından kelgen mektüpler onı pek destekley", — dep Kreml reinesiniñ apayı qayd etti.
Umumen, adam qorantasınen aman-aman bir sene, yani işğal etilgen Aqmescitniñ 2. SİZOğa etap etilemden evel soñki qısqa körüşüvden soñ körüşmedi.
Hatırlatamız ki, 2015 senesi Asan Ahtemov "Avdet" qırımtatar gazetasınıñ muarririniñ yardımcısı olıp çalışa, "Altın tamğa" cumhuriyet şahmat turnirini teşkil etmege yardım ete, qırımtatar tilinde er senelik onlayn ilmâsını teşkil ete edi ve qırımtatarlarnıñ medeniy ve cemaat yaşayışına bağışlanğan çeşit aktsiyalarnıñ iştirakçisi edi.
Nariman Celâl ve Ahtemov qardaşları aqqında ne bilemiz
Nariman Celâlov — 2016 senesi Rusiye tarafından "ekstremist teşkilât" olaraq tanılğan Qırımtatar Milliy Meclisiniñ başınıñ muavinidir. Aziz ve Asan Ahtemovlar — qırımtatar faalcileridir.
2022 senesi berim ayınıñ 3 ve 4. künleri Aqmescitte ve Kezlevde beş qırımtatarı — iş adamı Eldar Odamanov, ağa-qardaşlar Aziz ve Asan Ahtemov, Şevket Üseinov ve Nariman Celâlovnı, Anğara köyünde gaz borusını patlatqanlarında şübeli sayılıp, tutuldı.
2022 senesi berim ayınıñ 6-nda işğalli "makeme", tutulğan qırımtatarlarnı apiske aldı.
2022 senesi berim ayınıñ 21-nde Qırımnıñ işğalli Yuqarı makemesi, Qırımtatar Milliy Meclisiniñ başınıñ muavini Nariman Celâl, vatandaş jurnalisti Asan Ahtemov ve onıñ qardaşı Aziz Ahtemovğa üküm çıqardı.
Celâlov 17 senege üküm etildi, 700 biñ ruble para cezasını aldı ve 1,6 sene devamında areket serbestligi sıñırlandı.
Asan Ahtemov 15 sene apis cezasını, 500 biñ ruble para cezasını aldı ve 1 sene devamında areket serbestligi sıñırlandı. Aziz Ahtemov 13 sene apis cezasını, 500 biñ ruble para cezasını aldı ve 1 sene devamında areket serbestligi sıñırlandı.
2023 senesi bozârğan ayda Qırımtatar Milliy Meclisiniñ başı Refat Çubarov, Aqmescit 2. SİZOnıñ memuriyeti Celâlov ve Ahtemov qardaşlarını maneviy ve fizikiy cezalandırğanını bildirdi.
2023 senesi orta küz ayınıñ başında Celâlov ve Ahtemov qardaşları Qırımdan Rusiye apishanesine etap etildi.
Telegram ve Facebookta Suspilne Qırım haberlerine abune oluñız
