Rusiye tarafından "Hizb ut-Tahrir" davasında 12 senege maküm etilgen qırımtatar siyasiy mabüsi Emil Cemadenovnıñ sağlıq vaziyeti fenalaşa. Adamnı, tüzetüv müstemlekesinde peyda olğan qasıq yarığı hastalığı raatsızlay.
Qırımtatar Maaliy Merkezine siyasiy mabüsniñ ömür arqadaşı Liana Belâlova bunı bildirdi.
Onıñ aytqanına köre, aqayı endi dört senedir kolonnada buluna. Bu vaqıt devamına o pek zayıfladı, bunı endi körmek mümkün. Şimdi ise o, aşını tüzetmege tırışa. Şekerni kesip, aş aşamağa mümkün olğanı qadar un mahsulatını aşamay, çünki hronik aşqazan hastalığı bar.
"Onı eñ çoq apishanede peyda olğan qasıq yarığı hastalığı raatsızlay. Ekimler onı baqtılar ve ameliyat kerek olğanını ayttılar", - dedi siyasiy mabüsniñ apayı.
O şunı da qoştı ki, keçken yaz ömür arqadaşı ve anası müstemlekeniñ yolbaşçısınıñ muavininen körüşüvge bardılar. Adamnıñ hronik hastalıqlarını muzakere ettiler. Müstemlekede oña ameliyat içün razılıq arizasını imzalamaq kerek olğanını añlattılar, amma apishaneniñ şaraiti yaramay, qorantaları ise bundan qorqalar.
"Bundan da ğayrı, Cemadenovnıñ körme qabiliyeti bayağı fenalaştı, tişleri bozula, ve uzun vaqıt suvuqta yatqan soñ, qolları ve boynu ağra", - dep tarif etti Liana Belâlova.
Sağlığı fenalaşqanına baqmadan, adam tikiş işhanesinde çalışmağa devam ete. Onıñ iş cedveli aftada altı kün, saat 9:00-dan 17:00-ge qadar, Cumaertesi ise qısqartılğan kün. Emilniñ sağlığı sebebinden müstemleke aşları er vaqıt kelişmey, onıñ aşları sıq-sıq aileden ketirile.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız
