Rusiye tarafından 19 senege maküm etilgen vatandaş jurnalisti Remzi Bekirov qorantasınen körüşti. Siyasiy mabüsniñ apayı onıñ pek deñişkenini ayttı. Erkek pek zayıf, köz çuvulları peyda oldı.
Bunı Halide Bekirova Facebook saifesinde yazdı.
Onıñ aytqanına köre, o ve üç balası adamnı körmek içün beş biñ kilometrden uzaq yol keçkenler. Amma Remzini körgende, uzun apis müddeti oña ne qadar tesir etkenini añlağanlar: yüzünde yorğunlıq ve açlıq izleri bar edi.
"Üç balanen bu uzun yolnı keçip, müstemlekege keldik ve tuvğan Remzini kördik. Körünişi pek deñişti: bayağı zayıfladı, közl çuvulları peyda oldı, yanaqları. Ceza izolâtorında ve seert tutuv şaraitinde uzun müddet yatqan soñ, yüzünde yorğunlıq ve aşsızlıq izleri peyda oldı. Amma Remzinıñ tabiatı altı yıl devamında deñişmedi. O, aynı şu duyğusal, qayğırıcı, yımşaq, yahşı ve aydın edi", - dep tarif etti qadın.
Aile üç kün devamında beraber edi — aman-aman altı yıl içinde ilk kere olğan körüşüvniñ uzunlığı.
"Üç kün devamında balalar sevimli babasından ayırılmay ediler. Pencere ve qapı arqasında qoyulğan qamaçavlar olarnı aile subetlerinden ayırıp olamadı. Aman-aman altı yıl içinde ilk sefer beraber cemaatnen namaz qıldılar. Olar beraber Quran-ı Kerimniñ 30 cümlesini ezberden tekrarlay ediler, ilimlerniñ çeşit saalarında bilgilerini paylaşa ediler. Olar böyle sıcaqlıq ve sevginen qonuşa ediler ki, vaqıtnı toqtatmağa istey edim. Lâkin hainniñ saati toqtatıldı ve bizim içün qıymetli olğan bahtlı daqqalarımıznıñ sayuvı başlandı. Üç kün üç saat kibi keçti", — dedi Halide Bekirova.
Remzi Bekirov aqqında ne bilemiz
Remzi Bekirov — Qırım sakinlerine qarşı siyasiy sebepli davalarda tintüv ve makemelerniñ onlayn yayınlarını alıp barğan içtimaiy jurnalisttir. O, Qırımdaki siyasiy mabüslerniñ qorantalarına yardım etmek ğayesiniñ teşebbüsçisidir. Onıñ üç çağına yetmegen balası bar.
2019 senesi saban ayınıñ 27-nde Qırımda kütleviy tintüvler keçirildi. Taqiqat tedbirleri esasen qırımtatarlarnıñ yaşağanları Aqmescit civarındaki Bavurçı, Mamaq, Yañı Abdal köylerinde keçirildi. O vaqıt Rusiye FSBniñ hadimleri yigirmi insannı tuttılar. Daa üçü bir qaç kün içinde Rostov-na-Donu şeerinde tutuldı, üçü qıdıruvğa ilân etildi. Daa soñ bu iş üzerinde daa eki qırımtatar adamı tutuldı.
25 qırımtatar cemaat faalcisi "Hizb ut-Tahrir" islâm siyasiy firqasında iştirak etkeninde qabaatlandı. Apiske alınğanlarnıñ çoqusı "Qırım birdemligi" uquq qorçalayıcı birleşmesiniñ iştirakçileridir. Şaban Umerov, Remzi Bekirov, Riza İzetov ve Raim Ayvazov Rusiye Ceza qanunnamesiniñ 205.5 maddesiniñ 1-inci qısmına binaen terror teşkilâtınıñ faaliyetini teşkil etüvde qabaatlanalar.
2022 senesi saban ayınıñ 10-nda Rostov-na-Donudaki Cenübiy bölge arbiy makemesi, uquq qorçalayıcı Remzi Bekirovnı 19 senege maküm etti.
2024 senesi oraq ayında Bekirovnı Rusiyeniñ Krasnoyarsk vilâyetindeki 2. Yeniseysk apishanesinden çıqardılar. Bundan evel onı Qırımğa yaqın olğan Rusiye Federatsiyasınıñ Rostov vilâyetindeki müstemlekesine etap etmege red etken ediler. Adam tek maküm etilecek soñ etap yerine şikâyet etmek mümkün eken.
Qırım siyasiy mabüsi, 2024 senesi saban ayında müstemlekede bulunğan vaqıt apis cezasına qadar müddetini esapqa almağa tırıştı. Amma Bekirovnıñ davası baqılğan Çita şeeriniñ 2-nci Şarqiy bölge arbiy makemesi cevap yollamadı, ve müddetniñ ğayrıdan sayılması aqqında qararnı qabul etmedi. Bu sebepten qırımtatar apishanede belgilengen müddetten çoq tutuldı.
Telegram, WhatsApp ve Facebookta Suspilne Qırım haberlerine abune oluñız
