Qırımtatar jurnalisti, "Armançıq" bala mecmuasınıñ baş muarriri Ediye Muslimovanı Qırımda FSB hadimleri tuttılar. Onı belli olmağan yerge alıp kettiler, şimdi FSB binasında buluna. Tahminlerge köre, Muslimovanı uydurılğan qabaatlavlarnı itiraf etmege zorlaylar.
"Qırımdan şimdi tasdıqımız bar: Ediye Muslimovanı tünevin maşnağa zorlap minderip, belli olmağan yerge Rusiye FSBniñ azapçıları alıp kettiler. Şimdi o, Rusiye FSBniñ binasında buluna. Onıñ statusı belli degil, amma yüzlernen başqa qırımtatarlar buña oşağan tevqifniñ tecribesinden, Edyie Muslimova yaqalanuvından başlap, resmiy şübeli sayılğanına qadar, onı cezacılar uydurğan qabaatlarnı tanımağa mecbur etmek içün basqı altında buluna bile", - dep bildirdi Çubarov.
Daa evel o, boş aynıñ 21-nden itibaren Ediye Muslimovanen bağ yoq olğanını qayd etti.
"Ediye Muslimovanıñ ğayıp oluvı, öz halqınıñ maarifi içün küçüni, vaqtını ve bilgisini sarf etken er bir qırımtatarı ile Rusiye işğalcileriniñ muzakeresiniñ başlanuvına işaret ola bile", - dep qayd etti Çubarov.
Qırımtatar Milliy Meclisiniñ reisiniñ birinci muavini, sabıq siyasiy mabüs Nariman Celâl bunı bildirdi:
"Tasdıqlanmağan malümatqa köre, onı FSB hadimleri tutıp alğan ola bilir. Vaziyet, onıñ bulunğan yeri ve ilâhre ögrenile. Onıñ apishanede tutulğanını tasdiqlağan bir de bir malümat yoq, amma apishanede bulunğanını inkâr etken de bir de bir malümat yoq. Onıñ FSBde olğanını ne tasdıqlay, ne de red ete bile", — dep qayd etti o.
Aynı zamanda Celâl, tasdıqlanmağan malümatqa köre, Muslimovanıñ bulunğanı yerde beyaz "Gazel" bar edi, dep bildirdi.
"Men öz tecribemden ayta bilem ki, beyaz "Gazel"lerni FSB hadimleri qullanalar. Tutulğanlarnı, apiske alınğanlarnı ve ilâhre FSBge ya da FSBden makemelerge ya da başqa müessiselerge alıp ketken eski furgonlardır. Bu tek tahmin, amma ğaliba, büyük bir ihtimal bar", — dep qayd etti sabıq siyasiy mabüs.
Uquq qorçalayıcı Lütfiye Zudiyevanıñ öz menbalarından alınğan malümatına köre, Ediye Muslimovanı beyaz "Gazel" maşnasına üç belgisiz adam mindirgen.
"Ediye Muslimovanıñ ğayıp oluvınıñ başqa variantlarını tüşünmeymiz, çünki onıñ 91 yaşındaki anasını ziyaret etecek olğanını bilemiz. Ediye Muslimovanıñ ğayıp oluvı, öz halqınıñ maarifi içün küçüni, vaqtını ve bilgisini sarf etken er bir qırımtatarnen Rusiye işğalcileriniñ davalarınıñ başlanması içün bir işaret ola bile", — dep qayd etti o.
Bundan ğayrı, Nariman Celâl hatırlattı ki, keçenlerde jurnalist, muarrir Zera Bekirovanıñ evi tintildi. Bundan soñ işğalli akimiyet tarafından "Qırım" gazetasına basqı başlandı, onıñ vekillerine qarşı bir qaç "memuriy protokol" tizildi ve para cezaları berildi.
"Armançıq" gazetasınıñ muarririyeti "Qırım" gazetasınıñ muarririyetinen bir binada yerleşe. Ve men bu yerde Rusiye hızmetleriniñ böyle medeniy meydançıqlarnı işlep çıqarğanını körem, anda olarnıñ hadimleri öz işlerinen cemaat fikrine tesir etmek imkânına saip olalar. Yani, bunı böyle yapmaq mümkün. Elbette, bu menim subyektiv tahminimdir", — dep qayd etti o.
Ediye Muslimova aqqında ne bilemiz
Nariman Celâl, Suspilne Qırımğa aytqanı kibi, Muslimova maarif, neşriyat faaliyetinen de oğraşa ve "qırımtatar medeniyetiniñ, hususan bala edebiyatınıñ inkişafı içün daima çalışqan edi". O, onı "qırımtatar ziyalılarınıñ belli temsilcisi" dep adlandırdı.
"O, iç bir vaqıt açıq siyasetnen oğraşmadı, amma daima şu qadar añlı, faal, qırımtatar edi. Öz cemaat, grajdanlıq nazar noqtası, siyasiy nazar noqtası bar edi, amma, yazıq ki, bugün Qırımda onı ifade etmek mümkün degil", — dep tarif etti Meclisniñ reisiniñ birinci muavini.
Aynı zamanda "Armançıq" qırımtatar bala mecmuası, onıñ baş muarriri Muslimova ola, çeşit yaştaki balalar içün em bilgi, em de eglencenen bağlı pek çoq meraqlı malümat bar. Hususan, çizgi romanlar, şiirler ve masallar.
"Şimdi böyle bir publitsistik materialnı yazıp çıqarmaq pek qıyın, amma o, bunı endi bir qaç yıl devamında yapa edi ve böyle küçük taqımınen devam ete edi", — dep qoştı Celâl.
Hatırlatamız ki, 61 yaşındaki Ediye Muslimova boş aynıñ 21-nde aqşamdan berli Qırımda ğayıp oldı. Tuvğanları "polis"ke muracaat etip, qıdırmağa başladılar, dep onıñ qardaşınıñ qızı Elzara Muslimova "Qırım birdemligi"ne bildirdi.
Telegram, WhatsApp ve Facebookta Suspilne Qırım haberlerine abune oluñız
