Aqmescitteki Kıyiv rayon makemesi, BMTnıñ Qırımdaki insan aqlarınıñ bozulması aqqında maruzasını yayınlağanı içün mustaqil qırımtatar gazetası "Qırım"nıñ ("Къырым") temsilcileri Seyran İbragimov ve Bekir Mamutnıñ para cezalarını deñiştirmedi.
Bunı "Qırım esnası" teşebbüsi bildirdi.
Makemeci, 250 biñ rublelik para cezasını deñiştirmeyip, şikâyetni red etti.
Daa evel, orta küz ayınıñ 2-nde, beñzegen qarar neşir muarriri Bekir Mamutnıñ istinaf şikâyetine qarşı qabul etilgen edi. O, 130 biñ ruble para cezasını aldı. Ekisi de BMTnıñ baş kâtibi Antonio Guterresniñ Qırımdaki taqiqat izolâtorlarında insanlarnıñ işkence ve hırsızlanuvı aqqında maruzasınıñ derc etilmesi sebebinden "malümat serbestliginiñ bozuluvı"nen bağlı.
Makeme, BMTnıñ saytında derc etilgen maruzasını yañlış dep tanıdı. Bu qarar, 2017 senesinden berli işkence aqqında bir de bir muracaat qayd etilmegenini bildirgen Qırım İçki işler nazirliginiñ cevabına esaslandı.
Qayd etmek kerrek ki, Bekir Mamutov 2021 senesi de aynı qabaatlavlar boyunca mesüliyetke çekilgen edi. Bu sene onıñ evinde, Seyran İbragimovnıñ yaşağan yerinde ve "Qırım" gazetasınıñ muarririyeti tintildi. Bundan soñ olarnı 790 biñ rublelik para cezasına maküm ettiler.
Telegram, WhatsApp ve Facebookta Suspilne Qırım haberlerine abune oluñız
