Aqmescit şeeriniñ işğalli Kıyiv rayon makemesi advokat Rustem Kâmilevni Rusiye Federatsiyasınıñ Memuriy cinayetler qanunnamesiniñ 20.3 maddesiniñ 1-inci qısmına binaen qabaatlı tanıp, oña 10 künlik apis cezasını berdi. Boş aynıñ 7-nde keçirilgen tintüvlerden soñ tutulğan Kâmilevge qarşı tizilgen daa bir "memuriy protokol" baqıla. Bundan ğayrı, işğalli makeme oña 50 biñ rube (15 biñ grivna) para cezasını berdi.
Bunı "Qırım birdemligi" cemaat teşkilâtı bildirdi.
İmayeciler tarafında "makemede" advokat Edem Semedlâyev, adliyeciler Nazim Şeyhmambetov ve Lilâ Gemeci bar ediler.
Şimdilik işğalli makeme teneffüs ilân etti, bundan soñ Rusiye Federatsiyası Memuriy uquq bozuvları qanunnamesiniñ 20.3.3 maddesiniñ 1-inci qısmı boyunca ekinci "memuriy protokol" baqılacaq.
İşğal etilgen Qırımda advokatlarnıñ taqipleri
2023 senesi orta küz ayınıñ 13-nde ruslar advokat Oleksiy Ladinni tuttılar. Tintüv ve yaqalav vaqtında ondan advokat sırını taşığan malümat alındı. Ladin 14 künge "yasaqlanğan timsallerni numayış etkeni" içün apiske alındı ve içtimaiy ağda cenkke qarşı yazısı içün para cezasını aldı. Qırımnıñ işğalli polisi apiske alınğan advokatnıñ uquqiy faaliyet litsenziyasını lâğu etmege rica etti.
2022 senesi arman ayında Çeçenistan Advokatlar palatası qırım advokatları Lilâ Gemeci, Rustem Kâmilev ve Nazim Şeyhmambetovnı ihtisasiy statusından marum etti. Bu sebepten olar cinaiy işlerde iştirak etip olamaylar.
2022 senesi mayıs ayında işğalciler eki imayecini tuttılar: Emine Avamileva beş kün apiske alındı, Ayder Azamatov sekiz künge apiske alındı. Ekisi de makemege Nazim Şeyhmambetovnı qorçalamaq içün kelgenlerinde yaqalandı.
2023 senesi mayısnıñ 26-nda işğal etilgen Qırımda "makeme" advokat Edem Semedlâyevni "Rusiye Silâlı quvetleriniñ itibarını tüşürüvde" qabaatlı tanıdı. Advokat 75 biñ ruble para cezasını aldı.
Advokat Emil Kurbedinovnı kiçik aynıñ 15-ne qadar eki kere tuttılar: 2017 ve 2018 seneleri.
2023 senesi çiçek ayınıñ 15-nde işğalciler qırım advokatları Lilâ Gemeci ve Rustem Kâmilevniñ advokatlıq litsenziyasını lâğu ettiler, şunıñ içün olar öz imayesi altındaki şahıslarnı cinaiy davalarda qorçalap olamay, olarnıñ menfaatlarını makemege qadar taqiqat ve makemelerde temsil etip olamay. Olarnıñ arasında 13 qırım siyasiy mabüsi bar.
Hatırlatamız ki, boş aynıñ 7-nde Rustem Kâmilev ve daa bir advokat Lilâ Gemeciniñ evinde İşğalli Aşırıcılıqqa qarşılıq merkeziniñ hadimleri tintüv keçirip, Kâmilyevni tuttılar.
İşğalciler oña qarşı "Rusiye Federatsiyası Silâlı quvetlerini itibardan tüşürüv" ve "natsist timsalleriniñ teşviqatı" içün eki "memuriy protokol" tizdiler.
Ukraina prezidentiniñ Qırım Muhtar Cumhuriyetindeki temsilciligi boş aynıñ 7-nde Gemeci ve Kâmilevniñ evinde keçirilgen tintüvlerni takbih etti.
Telegram, WhatsApp ve Facebookta Suspilne Qırım haberlerine abune oluñız
