Ukrain askerleri tarafından yapılğan ücüm neticesinde işğal etilgen Qırımnıñ Kefede deñiz yermay terminalında yanğınnı orta küz ayınıñ 7-nde gece söndürmege devam eteler. Yanğın sebebinden yanıcı maddeler avağa çıqtı.
Qırımnıñ işğalli yolbaşçısı Sergey Aksenov öz Telegram kanalında bunı bildirdi.
Gauleiterniñ aytqanına köre, o, vaziyetni şahsen nezaret ete, er 30 daqqa içinde video vastasınen haber ete. O, tahliye alanı arttırılmağanını ve fevqulâde vaziyetni yoq etmek içün bütün kerekli tedbirler alınğanını qayd etti.
Yerli sakinlerni tek resmiy menbalarğa işanmağa çağıralar.
"Qırım yeli" Telegram kanalı şaatlarnıñ aytqanına atıf eterek bildirdi ki, gece daa eki tsisterna patladı, yanğın küçlendi, yanğın şeerniñ er bir rayonından körüne edi.
Kefedeki yermay bazasına ücüm aqqında ne bilemiz
İşğalli Kefe şeeriniñ akimiyeti bildirdi ki, orta küzniñ 7. gecesi şeerde bir qaç patlama oldı. Qırımnıñ eñ büyük "Kefe" yermay deñiştirüv terminalında yanğın çıqtı. Umumen yarımadada eki böyle terminal bar. Ekincisi Aqyarda yerleşe.
Aynı şu künü Ukraina Silâlı quvetleriniñ raketa ordularınıñ bölükleri mudafaa quvetleriniñ başqa qısımlarınen beraber işğal etilgen Kefede deñiz yermay terminalına zarar ketirgenlerini tasdıqladı.
Kefedeki yermay bazasını bir buçuq ay içinde ğayrıdan tikleycekler, dep "Suspilne. Studiya"da arbiy mütehassıs, "Strategiya XXI" Globalist Merkeziniñ havfsızlıq programmalarınıñ reberi Pavlo Lakiyçuk bildirdi. Bu, Rusiye ordusınıñ cenübiy Ukrainada ve yarımadada logistikanen bağlı ciddiy toqtatıluvı ve zarar ola bilir. Onıñ fikirince, Qırımnıñ vatandaşları içün de aqibetleri olacaq.
Orta küz ayınıñ 10-nda, yermay terminalı ücüm etilgen soñ, yerli akimiyet 1137 insannı tahliye etti.
Suspilne Qırımğa arbiy mütehassıs Vladıslav Seleznöv qayd etkenine köre, bu, bu terminalğa ilk büyük ve semereli ücümdir. Yanğın bir qaç kündir devam ete, ve sıcaq sebebinden onı söndürmek imkânsız.
Ukraina prezidentiniñ Qırım Muhtar Cumhuriyetindeki daimiy temsilcisiniñ yardımcısı Denıs Çıstikov bildirdi ki, işğalciler, yermay bazası ücüm etilgen soñ, yaqarlıq satılmasına sıñırlav kirsetmege mecburlar.
Telegram, WhatsApp ve Facebookta Suspilne Qırım haberlerine abune oluñız
