Qırımnıñ işğalli Yuqarı makemesi Aqmescitniñ Kıyiv rayon makemesi, faalci Memet Lümanov ve Rustem Osmanovnıñ SİZOda apis müddetini 2024 senesi boş aynıñ 4-ne qadar uzatmaq qararını yerine ketirdi.
Advokatlar Oleksandr Stasük ve Emil Kurbedinov "Qırım birdemligine" bunı bildirdiler.
Uquq qorçalayıcılar makeme qapalı şekilde keçirilgenini qayd ettiler. Olarnıñ aytqanına köre, siyasiy mabüsler oturışta Aqmescit SİZOsından video konferentsiyası bağı vastasınen iştirak ettiler.
İmayeci taraf, "Yuqarı makeme"niñ qararı esassızdır, dep tüşüne, çünki, advokatlarnıñ fikirince, qarar taqiqatçınıñ tahminlerine esaslana.
"Taqiqatçı, bu adamlar gizlene bileler, taqiqatqa tesir ete bileler, şaatlarnı qorquza bileler ve delillerni yoq ete bileler, dep tahmin ete edi. O, bu tahmin ve qorqularını tasdıqlamay ve tasdıqlamadı. Er şey, nasıl deycek olsalar, adiy olıp keçti. Makeme bir de bir bozuv körmedi ve Kıyiv rayon makemesiniñ qararını deñiştirmedi", — dep advokat Emil Kurbedinov "makeme"niñ qararını tefsir etti.
"Hizb ut-Tahrir davası"nıñ üçünci Canköy gruppası aqqında ne bilemiz
2024 senesi martnıñ 5-nde saba Qırımnıñ Bağçasaray ve Canköy rayonlarında Rusiye quvetçileri on qırımtatar adamınıñ evini tinttiler.
Aynı künü "makeme" dört qırımtatar faalcisini - Memet Lümanov, Aziz Azizov, Rustem Osmanov ve Mustafa Abduramanovnı yaqaladı. Olarnı 2024 senesi mayısnıñ 4-ne qadar 2. SİZOsına yolladılar.
Martnıñ 6-nda işğalli makeme 6 qırımtatar faalcisine tevqif tedbirlerini belgiledi. Sabıq imam Remzi Kurtnezirovğa ev apsi şeklinde tevqif tedbirini saylamaq qararı çıqarıldı. Amet Nariman, Ali Mamutov ve Arsen Kaşka, Enver Halilayev ve Vahid Mustafayevge işğalli mahkeme bu sene mayısnıñ 5-ne qadar SİZOda tutuv şeklinde tedbir aldı.
Er kesni "Hizb ut-Tahrir" islâm siyasiy firqasında iştirak etmege red eteler. Apiske alınğanlarnıñ çoqusı — çoq balalı babalardır.
Aqmescitniñ Kıyiv bölge makemesi çiçek ayınıñ 25-nde "Hizb ut-Tahrir davasınıñ" üçünci Canköy gruppasınıñ mabüslerini apiske almağa devam ettirdi. Olar Canköy ve Canköy rayonından qırımtatarlar - Enver Halillayev, Nariman Ametov, Ali Mamutov, faalci Arsen Kaşka ve Lobanovo köyündeki caminiñ imamı Vahid Mustafayev. Olar arman ayınıñ 3-ne qadar Aqmescitteki 2. SİZOda qalacaqlar.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Keçenlerde belli olğanına köre, Rusiye makemesi, Rusiye uquq qorçalayıcı leyhası "Siyasiy mabüslerge destek. Memorial" tarafından siyasiy mabüs olaraq tanınğan qırımtatar Leniye Umerovnıñ tevqif müddetini boş aynıñ 4-ne qadar uzattırdı.
Telegram ve Facebookta Suspilne Qırım haberlerine abune oluñız
