Qırımda bozarğan aynıñ 25-nde Rusiye ordusınıñ Çavda burnundaki arbiy alanında yanğın qayd etildi, anda işğalciler "Şahed"lerni uçuralar. Bozarğan aynıñ 26-nda yanğın meydanı bir qaç qat arttı.
"Radio Svoboda" rus hızmetiniñ yayınlağanı yoldaş resimleri bunı tasdıqladı.
Yanğın meydanı kün devamında pek arttı, bunıñ neticesinde ateş arbiy bölükte olğan binalarğa da yetti.
Yanğınnıñ sebebi şimdi belli degil. Çavda burnu rayonında bir qaç Rusiye arbiy obyektleri, şu cümleden poligon yerleşe. 1980 seneleriniñ soñunda o qapatıldı, amma 2016 senesi Rusiye onı ğayrıdan açtı.
Hatırlatamız ki, 2023 senesi oraq ayınıñ soñunda Ukraina Ava quvetleri ilk sefer "Çavda" arbiy poligonından Odesa vilâyetiniñ liman astyapısına ücüm etmek içün iran dronlarınıñ çıqışını qayd etti. Mında olarnı, Rusiyeniñ Primorsk-Ahtarsk tarafından yapılğan uruşlarnen paralel olaraq, cenübiy Ukrainağa ücüm etip başladılar.
Telegram ve Facebookta Suspilne Qırım haberlerine abune oluñız
