İşğal etilgen dörtünci kassatsiya makemesi emşire ve içtimaiy jurnalist İrına Davılovıçnıñ davasınen bağlı oturışnı 2024 senesi mayıs ayınıñ 2-ine uzattı.
"Qırım ketişatı" uquq qorçalayıcı teşkilâtı bu aqqında haber berdi.
Babası evelki aytqanı kibi Danılovıçnıñ yaramay sağlıq alı sebebinden makeme oturışı uzatıldı. O añlattı ki, hatsalıq sebebinden qızınıñ sol qulağı eşitmey. Apishaneniñ tibbiy hadimleri ise oña resmiy diagnoz qoymağa red etteler.
Qırım siyasiy mabüsiniñ yaramay sağlıq alından ğayrı, oturışnıñ uzaılmasınıñ sebebi "video konferentsiyasınıñ bağınıñ yaramay keyfiyeti" oldı.
"Kassatsiya şikâyetnamesiniñ baqıluvınıñ birinci basamağında İrına Danılovıç bildirdi ki, o iştirak etmede şikâyetname baqılacaq, çünki onı tedaviylemegenleri sebebinden özüni imaye etemez. Makemeci İvan Ğromovnıñ iştirakinen makeme eyyeti, şikâyetnameniñ baqıluvını uzatmağa qarar aldı. Qabaatlanğan qadın ceryanda iştirak etmege red etmesinen bağlı yazılı ariza almağa isteyler. Bundan ğayrı, makeme siyasiy mabüsniñ sağlıq alı aqqında tibbiy vesiqalarnı davağa qatıldı", — dep bildirildi.
Qayd etemiz ki, eki sene evel bugün işğal etilgen Qırımda rus quvetçileri İrına Danılovıçnı qanunsız olaraq tuttılar. Bu, 2022 senesi çiçek ayınıñ 29-ında oldı.
İrına Danılovıç aqqında ne bilemiz
Saban ayınıñ 29-ında vaqtınca işğal etilgen Qırımda işten evge qaytqanda İrına Danılovıç ğayıp oldı. Aynı kün Kefe yanında Oy Quyu köyündeki evi tintildi. Anda ana-babaları yaşağan ediler, evini tintkende işğal quvetçileri cep telefonı ve tehnikasını alıp çıqardılar.
Bir qaç ay devamında tibbiy yardım talap etken soñ saban ayınıñ 21-inde açlıq çekmege ilân etti — izolâtorda, ayrıca keçken sene üküm çıqarılğan soñ onıñ sağlığı pek zayıfladı.
Cinaiy davasınıñ bilgilerinen tanış olıp bitirmek içün qanunsız "Kefe şeer makemesi"ne ketkende Danılovıç bayıldı. Bundan ğayrı, azaplar sebebinden açlıq ilân eter.
Çiçek ayınıñ 6-sında jurnalist açlıq bitirdi, çünki onı teşkermek ve tedaviylemek içün onı Aqamescitteki SİZOdan hastahanege alıp ketirmege söz berdiler.
Bozarğan aynıñ 29-ında işğal etilgen Qırım Yuqarı makemesi içtimaiy jurnalist ve faalci İrına Danılovıçnıñ ükümini deñiştirdi. Bundan evel patlayıcı alet saqlağanı sebebinden yedi senege malüm etildi. Apellâtsiya makemesiniñ qararına köre ceza müddeti bir ayğa azladılar.
Keçken sene boş ayda bildirildi ki, Danılovıç sanitar olmağan şartlarda buluna ve ihtiyac duyğanına baqmadan onı tedaviylemeyler.
Telegram ve Facebookta Suspilne Qırım haberlerine abune oluñız