Перейти до основного змісту
İrına Danılovıçnıñ babası, qızı olğan siyasiy mabüsniñ davası ve sağlıq alını añlattı

İrına Danılovıçnıñ babası, qızı olğan siyasiy mabüsniñ davası ve sağlıq alını añlattı

Ексклюзивно

İrına Danılovıç — 2022 senesi çiçek ayında işğal quvetçileri tarafından tutulğan ve 7 senege qanunsız olaraq maküm etilgen içtimaiy jurnalisttir. Tevqif etilmeden evel o, siyasiy mabüslerniñ sahte davalarını ve yarımadadaki sağlıq sistemasınıñ alını aydınlatqan edi.

Babası Bronislav Danılovıç, işğalcilerniñ faalcini ne içün taqit etkenini, aqrabalarınıñ onı nasıl hatırlağanlarını, sağlıq alını ve aqrabalarınen nasıl bağlanğanını Suspilne Qırımğa añlattı.

2022 senesi çiçek ayınıñ 29-ında İrına Danılovıç işten qaytqanda Köktebeldeki turaqta RF FSB işçileri onı tutıp aldılar. Olar evini tinttiler. Birazdan ana-babası ögrendiler ki, status ve advokat yardımını almadan İrına bir aftadır FSB mağazında buluna.

"Onı tahminen 12 kün devamında qıdıra edik. Onı SİZOğa alıp ketirgen soñ bilmey edik. Anda buluna ve dayana. Makeme onı 2 ayğa maküm etti. Biz, bunıñ sebebi bilmey edik. Qıdırmağa başlamasa edik, bugün ise o yoq olur edi. Çünki böyle vaqialar bar", — dep İrına Danılovıçnıñ babası añlattı.

Uquq qorçalayıcı ve emşire İrına Danılovıç, ihtisasiy birleşüv areketinde faalca iştirak ete edi, "Ekimler Alyansı" ihtisasiy birleşüviniñ qırım bölüginiñ başı oldı. COVID-19 pandemiyasında qırım hastahanelerindeki qabarcılıq shemalarını aydınlataraq, blog yazğan edi.

İçtimaiy jurnalist olaraq Danılovıç, mustaqil KHVnen çalışa edi: "INcir" ve "Qırım ceryanı" teşebbüsi. Siyasiy mabüslerge qarşı açılğan sahtedavalarnı añlata edi. Babası tüşüne ki, bunıñ sebebinden ruslar qızını taqip etmege başlağanlar.

"Fikrimce, İrınanıñ siyasiy taqibiniñ eki sebebi bar. Birincisi: qırımtatarlarğa qarşı makeme ceryanlarını aydınlatması. Ekincisi ise devlet tarafından COVID-19nen hastalanğanlarnı tedaviylemek içün ayırılğan paranıñ qanunsız masrafınen küreşidir", — dep Bronislav Danılovıç qayd etti.

Siyasiy mabüsniñ babasınıñ sözlerine köre, İrına vaqtınca işğal etilgen Qırımda olğan şeylerge muqavemet köstermeyip olmadı.

"Adaletsizlikni asla begenmey edi. Onıñ içün er şeyniñ adaletli, qanuniy olması eñ müim edi... O, er vaqıt adalet içün küreşe edi. Qırımnıñ Ukrainadan Rusiyege keçmesi. O, bunı pek menfiy şekilde yüzleşti", — dep Bronislav Danılovıç qayd etti.

İşğalciler İrına Danılovıçnı "patlayıcı aletlerni qanunsız olaraq saqlaması ve taşıması"nda qabaatladılar. Sanki o, közlük qutusında patlayıcı aletni taşıy edi. 2022 senesi ilk qış ayınıñ 28-inde işğal makemesi üküm çıqardı: umumiy rejimli müstemlekede 7 sene ve 50 biñ rublelik para cezası. Qabaatından patlayıcı aletni alması ve saqlamasınen bağlı maddeni alıp çıqardılar, amma onı taşımasınen bağlı maddeni qaldırdılar.

"Oña patlayıcı aletni gizlen berdiler. Ve onıñ közlük qutusında patlayıcı malzemeler olğanı içün onı sebepsiz 7 senege maküm ettiler. Bu sebepten men de külip turam. Saçma-sapan bir şey, başqaca bunı demem", — dep İrına Danılovıçnıñ babası qayd etti.

Şu anda İrına Qırımdan 800 km uzaqlıqta yerleşke Zelönokumsktaki rus müstemlekesinde buluna. Rusiye akimiyeti apishanede oña tibbiy yardım bermege qanunsız olaraq red ete.

"Onıñ sol qulağı şiddetli şekilde ağıra. O ev vaqıt ağlap tura edi ve qulaqta bu sızğıruv sesini dayanamaz, atta yüksek sesnen laf etemez", — dep Danılovıç qayd etti.

Bundan ğayrı, o bildirdi ki, rus müstemlekesiniñ ekiminiñ soy adını asla unutmaz.

"Morova açıq-aydın tarzda şunı ayttı: "Eşitme qabiliyetini coymağance, asap atrofiye oğraşmağance, qulağında ses eşitilir. Mında seni tedaviylemeycekler!", — dep Bronıslav Danılovıç hatırladı.

Amqescitteki SİZOda bulunğanda tibbiy yardım almaq içün İrına açlıq ilân etti, amma 10 künden onı bitirdi, çünki onı teşkermek ve tedaviylemek içün hastahanege alıp ketirmege söz berdiler.

"Kerçekten de dizgnoz qoymadılar. Onı qoymağa tırışmadılar. Çünki, añlağanıma köre, bu baş ağrısı bu qulaq sesi, Aqmescitteki FSBniñ mağazında çekkeni azaplarnıñ neticesidir. Ve belki, onıñ başını urğanınen o, mikro qalp krizini yaşağan", — dep İrına Danılovıçnıñ babası qayd etti.

Bronislav. Danılovıç hatırladı ki, apishanede İrınanıñ sol qulağı eşitme qabiliyetini tamamınen coydı. Qırımdan Zelönokumsktaki müstemlekege ketmek qart ve hasta ana-babası içün pek zor. Qızınen bağlanmağa tek yolu — sıq olmağan telefon laflarıdır.

İrına Danılovıç aqqında ne bilemiz

Saban ayınıñ 29-ında vaqtınca işğal etilgen Qırımda işten evge qaytqanda İrına Danılovıç ğayıp oldı. Aynı kün Kefe yanında Oy Quyu köyündeki evi tintildi. Anda ana-babaları yaşağan ediler, evini tintkende işğal quvetçileri cep telefonı ve tehnikasını alıp çıqardılar.

Bir qaç ay devamında tibbiy yardım talap etken soñ saban ayınıñ 21-inde açlıq çekmege ilân etti — izolâtorda, ayrıca keçken sene üküm çıqarılğan soñ onıñ sağlığı pek zayıfladı.

Cinaiy davasınıñ bilgilerinen tanış olıp bitirmek içün qanunsız "Kefe şeer makemesi"ne ketkende Danılovıç bayıldı. Bundan ğayrı, azaplar sebebinden açlıq ilân eter.

Çiçek ayınıñ 6-sında jurnalist açlıq bitirdi, çünki onı teşkermek ve tedaviylemek içün onı Aqamescitteki SİZOdan hastahanege alıp ketirmege söz berdiler.

Bozarğan aynıñ 29-ında işğal etilgen Qırım Yuqarı makemesi içtimaiy jurnalist ve faalci İrına Danılovıçnıñ ükümini deñiştirdi. Bundan evel patlayıcı alet saqlağanı sebebinden yedi senege malüm etildi. Apellâtsiya makemesiniñ qararına köre ceza müddeti bir ayğa azladılar.

Keçken sene boş ayda bildirildi ki, Danılovıç sanitar olmağan şartlarda buluna ve ihtiyac duyğanına baqmadan onı tedaviylemeyler.

Telegram ve Facebookta Suspilne Qırım haberlerine abune oluñız

Топ дня
Вибір редакції
На початок