2024 senesiniñ birinci üç ayı devrinde eñ yüksek bedeniy ve ruhiy sağlıq aqqınıñ eñ az 13 bozulması qayd etildi. Olardan 12-si qırımtatar halqınıñ vekillerine qarşı.
Çiçek ayınıñ 16-sında Qırımtatar Maaliy Merkezi bu aqqında haber berdi.
"Rustem Şeyhaliev, Server Mustafaev, Temur Abdulaev, Seitveli Seitablaev, Amet Süleymanov (2), İrına Danlovıç, Tofik Abdulgaziev (2), Remzi Kurtnezirov, Vladlen Abdulkadırov, Ali Mamutov ve Arsen Abhairov kibi qırım siyasiy mabüsleriniñ mezkür aqqı bolzuldı", – dep bildirildi.
Bildirildi ki, 2023 senesiniñ aynı devrinde 10 bozma, 2022 senesiniñ aynı devrinde ise 11 bozma qayd etildi.
QMM Amet Süyemanov ve Tofik Abdulgaziev qırımtatar siyasiy mabüslerine ayrıca diqqat celp ete. Merkezniñ bilgilerine köre, apishanede olarnıñ sağlıq alı pek zayıflaştı.
Hatırlatamız ki, keçenlerde ekimler Abdulgazievniñ verem ve başqa hastalıqlarnı çekkenini ögrendiler. Advokatları, adamnı apishaneden azat etmege talap eterek, rus makemesine ariza yolladılar.
"Bu insanlarnıñ ağır hastalıqları bar, SİZOlar ve apishanelerniñ uyğun olmağan şartları, sağlıqqa şikâyetlernni muntazam şekilde körmemezlikke urğanları ve vaqtında tibbiy yardım etmegenleri sebebinden olarnıñ sağlığı zayıflaşıp tura. Yazıq ki, yaramay neticeleri bar, siyasiy mabüsler Cemil Ğafarov ve Kostântın Şırinğ vefat ettiler", – dep QMM qayd etti.
Telegram ve Facebookta Suspilne Qırım haberlerine abune oluñız
