Siyasiy mabüslerni Qırımdan Rusiye Federatsiyasına etap ceryanı bir ay devam ete bilir. Bu vaqıt devamında Kreml esirleri aqrabalarınen bağlanamaylar ve ne yerge ketkenlerini aytamaylar. Bu vaqıt devamında olar, işğalciler tarafından azap çekeler. İmayeciler, olarğa sanktsiyalarnıñ kirsetilmesi içün rus apishanesine etap vaqtında siyasiy mabüslerni azaplağanlar aqqında bilgilerni toplaylar. Suspilne Qırım bu aqqında tafsilâtlıca añlata.
Böylece 12 senege maküm etilgen qırımtatar içtimaiy jurnalisti Amet Süleymanovnıñ apayı Lilâ Lümanova "Qırım birdemligi"ne añlattı ki, onıñ aqayı etap ceryanını zornen yaşadı.
Süleymanov, "terrorcılıq" aqqında sahte davağa mücibi ve Rusiyede yasaqlanğan, amma dünyanıñ ülkeleriniñ çoqusında ve Ukrainada serbestçe faal etken islâm fırqası Hizb ut-Tahrirge ait olğanı sebebinden maküm etildi.
"Ekim ayınıñ başında men, "Zonatelekom" vastasınen çoq beklegenim mektüp aldım. Anda o yazdı ki, berim ayınıñ 27-siniñ gecesi onı Vladimirge ketirdiler. Yani tamam bir ay yolda edi... Bu etap ceryanını zornen yaşadı. Çünki onıñ çoq hronik hatsalığı bar, elbette hasta bir insan bu pek zor", — dep Lümanova qayd etti.
Advokat Emil Qurbedinovnıñ sözlerine köre etap etmek, qanunsız tintüvler ve sahte cinaiy davalardan soñ siyasiy mabüslerge daa bir tesir usulıdır. Çünki siyasiy mabüslerni uzun vaqıt devamında Rusiyege ketirüv, işğalci bir devletniñ bile qanunlarını boza. Bu, advokatlarnıñ qabaatlanğan insanlarğa irişimine zorlaştıra ve aqrabalarınen körüşmek imkânı yoq ola.
"Babasını görmeğe istegen bala içün beş biñ kilometr yol, em maliyeviy, em vaqıt, em de sağlıq ceetinden büyük bir iştir", — dep Qurbedinov añlattı.
Lümanovanıñ aqayı, doğmuş Bağçasaraydan eki biñ kilometr uzaqlıqtadır. Buna baqmadan qadın, birinci körüşüvge müstemlekege ketmege planlaştıra. Apishanecilerden izin almağanına baqmadan.
"Şu anda o, körüşüv arizasını yazacaq, büyük oğlumnen ketecegim, çünki yol uzundır — eki biñ kilomert, nasıldır toqtamalar, nasıldır oturuvlardır. Uzun körüşüv iznini almağanımızğa baqmadan, bir ketecekmiz. Qısqa devamlı üç saat körüşmege becerse kerekmiz", — dep Süleymanovnıñ apayı añlattı.
Aynı zamanda etap ceryanını yaşağan ve Rusiyedeki müstemlekede 6,5 sene keçirgen sabıq qırım siyasiy mabüsi Andriy Zahtey de rus apishanesine etabını añlattı.
"Er bir etap bir-birinden farqalana, meni uçaqnen bile etap ettiler. Leftorovodan uçaqnen uçtım. Stolıpin vagonınen etap etüv bar, voronkalarnen etap etüv bar, yengil maşnalarnen etap etüv bar. FSB "lager"ge ya da "taqiqat"qa ya da başqa bir yerge insannı nasıl ketirecegini öz başına saylay", — dep Zahtey bildirdi.
2026 senesi işğalciler onı tuttılar ve 2018 senesi "Ukrainanıñ menfaatına diversiya faaliyeti" sebebinden maküm ettiler. Bundan ğayrı o, rus konvoyınıñ esir etilgen insanlarğa işkencelerini hatırladı.
"Moskvağa Levtorovoğa vertolöylernen ketirdiler. Deñiz astında toqtadılar, qapını açtılar ve şunı ayttılar: "Aydı onı alıp tüşür". Bizim ellerimiz bağlandı, başlarımızda çuvallar", — dep sabıq Kreml esiri añlattı.
Aynı zamanda Qırım uquq qorçalayıcı gruppasınıñ araştırıcısı İrına Sedova bildirdi ki, siyasiy mabüsler etap ceryanında tahminen bir ay devamında aqrabalarınen bağlanamaylar ve olarnı ne yerge ketirgenlerini haber beremeyler.
"Misal içün 20 kün devamında siyasiy mabüs müstemlekege kete bilir. Birinciden Krasnodardaki SİZOdan maşna naqliyatınen kete. Anda bir qaç kün o yuqlamaya ya da yuqlaya, sadece bar ola bilir, çünki bazıda yataq, bazıda minder bermege unutalar. İnsan başqa yerge ketmek içün diger naqliyatnı tabanda oturıp bekleye bilir. Bundan soñ bu müstemlekege yoldaki başqa şeerde onı endire bilirler. Ve böylece insan müstemlekege 20 kün ketkende beş-altı SİZOda buluna bilir", — dep araştırıcı añlattı.
Sedova haber berdi ki, şu anda imayeciler, olarğa sanktsiyalarnıñ kirsetilmesi içün rus apishanesine etap vaqtında siyasiy mabüslerni azaplağanlar aqqında bilgilerni toplaylar.
Bu sene arman ayında Ukraina Telükesizlik Hızmeti, Rusiye Federal ceza hızmetiniñ müdirine qarşı cinaiy dava açtı. Orta küz ayında QMC prokurorlığı, Qırımdaki işğal ceza hizmetiniñ reberi Vadım Bulgakovnı devlet hainliginde qabaaladı. Oña qarşı davanı makemege yolladı.
Telegram, Viber ve Facebookta Suspilne Qırım haberlerine abune oluñız
