2023 senesi devamında Qırımdan eñ az 25 siyasiy mabüs Rusiyedeki apishanelerge etap etildi.
"QırımSOS" uquq qorçalayıcı içtimaiy teşkilâtınıñ analitikacısı Yevheniy Yaroşenko bu aqqında haber berdi.
Oraq ayında olarnıñ sayısı 14 insan edi, amma berim ayınıñ 13-ünde ise sayısı daa 11 insana arttı.
"Qırım yarımadasından rusiye topraqlarına grajdanlarnı, şu cümleden siyasiy mabüslerni, etap etmek, cenk cinayetidir. İşğalciler böyle areketlerinen IV Jenevre şartnamesiniñ 29. ve 76. maddelerini bozalar. IV Jenevre şartnamesiniñ 76. maddesine mücibi "cinayet yapmaqta qabaatlanğanlar işğal etilgen ülkede bulunmalılar, maküm etilseler, anda da ceza müddetini keçirmeliler", – dep Yaroşenko qayd etti.
Qara qış ayında Rostov vilâyetindeki SİZOdan Lıpetsk vilâyetindeki apishanege Emil Ziyadinov ve Lenur Seydametov etap etildiler, Timur Yalkabov ise Ulyanovsk vilâyetindeki Dımıtrohrad apishanesine etap etildi. Rusiyede terrorcılıq olaraq tanınğan ve yasaqlanğan Hizb ut-Tahrir islâm siyasiy fırqasına sanki ait olğanları içün maküm etilgen olarnıñ ceza müddetini keçirmeleri içün olarnı RF topraqlarına ketirdiler.
Mayıs ayında Novoçerkasktaki SİZOdan Ulyanovsk vilâyetindeki Dımıtrohrad apishanesine Rustem Seitmemetov etap etildi. Bundan soñ Vladımırdaki apishanege Seitumer ve Osman Seitumerovlar qanunsız olaraq ketirildiler. Episileri "Hizb ut-Tahrirge ait olğanları" içün maküm etildiler. Bozarsan ayda Novoçerksaktaki SİZOdan "Hizb ut-Tahrir davası"nıñ ekinci Aqmescit gruppasınıñ iştirakçileri: Şaban Umerov Çelâbinsk vilâyetindeki Verhnöuralsk apishanesine, Riza İzetov Vladımır apishanesine etap etildiler. Mezkür fırqada faaliyet etmekte qabaatlanğan islâm ilimleri magistri Vadım Bektemirov Yeltsteki apishanege etap etildi. Aynı ay rusiye müstemlekelerine "Yehova şaatları"nıñ eki azası ketirildi. Keçken sene ilk qış ayında işğal qırım makemeleri, olarnı epis etmege maküm ettiler. Oleksandr Dubovenko Moskva vilâyetiniñ Kolomnadaki müstemlekege, Oleksandr Lıtvınük ise İvanovs vilâyetiniñ Talıtsi köyündeki müestemlekege etap etildiler. Saban ayında olar Aqmescitteki SİZOdan Rusiyedeki Krasnodarğa ketirildiler.
Ora ayında Novoçerkasktaki taqiqat izolâtorından Rusiyedeki apishanelerge "Hizb ut-Tahrir davası"nıñ ekinci Aqmescit gruppasınıñ daa üç iştirakçisi etap etildi, şu cümleden: Remzi Bekirov — Krasnodar kraydaki Yeniseysk apishanesine, Mecit Abdurahmanov ve Farhod Bazarov Saratov vilâyetindeki Balaşova apishanesine.
"Qırım sakinleriniñ epis etilmeleriniñ ve olarnı işğal etilgen Qırımdan çıqarılmalarınıñ qanunlığı ya da qanunsızlığına baqmadan aile azalarınıñ yaşananları yerlerden uzaqlıqta ceza müddetini keçirüv, Avropa insan aqları şartnamesiniñ 8. maddesi ve içtimai ve siyasiy aqlar aqqında halqara paktınıñ 17. maddesi tarafından garantiye etilgen aile ayatına ürmet aqqını boza bilir", - dep uquq qorçalayıcılar qayd ettiler.
Qırımtatar siyasiy mabüsleriniñ rusiyedeki apishanelerge soñ etap etilmeleri aqqında ne bilemiz
- "Hizb ut-Tahrir" davasınıñ ekinci Canköy gruppasınıñ iştirakçileri, Aqmescitteki taqiqat izolâtorından Rostov-na-Donudaki 1. SİZOğa etap etildiler.
- Rusiye makemesi tarafından 17 senege maküm etilgen ve bir qa. alp krizini yaşağan Qarasuvbazardan faalci, 59 yaşındaki qırımtatar Azamat Eyüpov Çelâbinsk vilâyetine etap etildi.
- Qırım siyasiy mabüsi Oleh Prıhodkö, sağlığına şikâyet ete ve onı deñiştirmege rica ete, çünki şu anda bulunğanı Rusiyeniñ Krasnodar Kraydaki apishanede ayatta qalmaycağından qorqa.
- Rusiye tarafından 12 senege maküm etilgen ve qalp hastalığına sahip olğan içtimai jurnalist, qırımtatar siyasiy mabüsi Amet Süleymanov Aqmescitteki SİZOdan "Vladimirskiy tsentral" olaraq belli olğan Volodımırdaki 2. apishanege etap etildi.
Telegram, Viber ve Facebookta Suspilne Qırım haberlerine abune oluñız
