Qırım siyasiy mabüsi Serğiy Dâçuknıñ sağlıq vaziyeti apishanede fenalaştı. Onıñ qırılmağan bir qaburğası qalmadı, yaramay eşite ve basqı altında buluna.
Qırımtatar Resurs Merkezi (QRM) bunı bildirdi.
«Rusiye işğalcileri tarafından bir buçuq yıldan ziyade "devlet hainligi" davası boyunca gizli apiste tutulğan 52 yaşındaki Qırım siyasiy mabüs Serğiy Dâçuknıñ ciddiy sağlıq meseleleri bar. Qırımtatar Resurs Merkeziniñ malümatına köre, adamnıñ qırılmağan bir qaburğası bile qalmadı, o yaramay eşite ve basqı altında buluna. Buña baqmadan, Serğiy deñiştirüv ve tuvğanlarına qaytmaq ümütini coymay», — dep qayd etildi QRMniñ haberinde.
Hatırlatamız ki, işğal etilgen Qırımda Rusiye quvetçileri tarafından yaqalanğan ve «devlet hainligi»nde qabaatlanğan Qırımlı quyumcı Serğiy Dâçuk apiste qala. Kelecek mahkeme oturışınıñ künü daa belgilenmedi.
Qorantasına yazğan mektübinde, esirlerni deñiştirüv çerçivesinde evge qaytmaq istegenini qayd etti.
«Tahqiqat esnasında maña deñiştirüvge razılığım aqqında sual bereler, ve men, elbette, razılığımnı, atta arzu ve teşebbüsimni bildirem. Bu olsa, elbette, pek quvanırım», — dep yazdı Dâçuk.
Adam bir buçuq yıldan ziyade tış dünya ile bağsız — «incomunicado» statusında — qaldı. 2026 senesi mayıs ayına qadar onıñ tuvğanları onıñ ne yerde bulunğanını ve oña ne olğanını bilmey ediler. Mayıs ayında mektüpni alğan soñ, qızı babası Simferopoldaki (Aqmescitteki) 2-nci SİZOda tutulğanını ögrendi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
