Ukrayina Tış işler nazirligi Bağçasaraydaki Hansaray toprağında Rusiye imperiyasınıñ areketlerini teşvit etemege yönelgen tedbirlerniñ keçirilmesine qarşılıqname bildirdi. Orta küz ayınıñ 31-nde — boş aynıñ 1-nde abide toprağında Rusiye imperiyasınıñ arbiy lageriniñ sözde «tarihiy» rekonstruktsiyası planlaştırılğan.
Ukrayina Tış işler nazirliginiñ saytındaki haberde bu malümat bildirildi.
«Hansaray — cihan emiyetli tarih ve medeniyet abidesi olıp, Ukrayina tarafından UNESCOnıñ Dünya mirasınıñ Evelki cedveline kirsetilgendir. Rusiye Federatsiyası qırımtatar halqına, onıñ medeniyetine, tarihiy hatırasına ve dünya medeniy mirasına qarşı muntazam şekilde cenk alıp bara. İşğalcilerniñ cinayetkâr areketleri UNESCOnıñ 2014 senesinden berli vaqtınca işğal etilgen Qırımda alıp barğan monitoringi vaqtında qayd etile», — dep bildirildi haberde.
Nazirlik Ukrayinanıñ UNESCO rehberligini ve teşkilâtnıñ azа devletlerini ruslarnıñ vaqtınca işğal etilgen Bağçasarayda tedbir keçirmek niyetleri aqqında resmen haberdar etkenini qayd etti.
«Biz UNESCOnıñ Baş müdirini, onıñ mesüliyetli organlarını ve Teşkilâtnıñ azа devletlerini Qırımnı vaqtınca işğal etken Rusiye tarafından yerli qırımtatar halqınıñ medeniy abidelerini imperiya teşviqatınıñ ve işğalniñ aqlanması ile meşur etüviniñ vastasına çevirüv ameliyatını toqtatmaq içün mevcut olğan bütün halqara vastalarnı deral qullanmağa çağıramız», — dep bildirdi TİN.
Nazirlik ayrıca UNESCOnı aşağıdaki tedbirlerni körmege çağıra:
- Rusiyeniñ vaqtınca işğal etilgen Qırım toprağındaki teşviqat areketlerine prinsipial qıymet kesmege.
- Ukrayina ve qırımtatar medeniy mirasını qorçalav boyunca halqara mehanizmlerni küçlendirmege.
- Rusiye Federatsiyasınıñ Ukrayinanıñ medeniy mirasını muntazam şekilde yoq etkeni içün mesuliyetini küçlendirüv meselesini közden keçirmege; bu areketler cenk cinayetleri alâmetlerini taşıy.
Hatırlatamız ki, RFnıñ Hansaraydaki areketleri sebebinden ırımtatar Milliy Meclisiniñ Prezidiumı Ukrayinanı UNESCOğa resmiy qarşılıqname yollamağa çağırdı
Ruslar Hansaray toprağında ne tedbirler planlaştırdılar
Rusiye imperiyası arbiy lageriniñ rekonstruktsiyasından ğayrı, aynı vaqıtta «1853–1856 seneleri Qırım cenki» müzey sergisi açılacaq; anda o devirniñ tarihiy eserleri körsetilecek.
Hatırlatamız ki, Qırım cenki resmen 1856 senesi saban ayınıñ 30-nda Parij barışıq anlaşması imzalanması ile bitti; bu anlaşma Rusiye imperiyasınıñ mağlübiyetini pekitti.
Vesiqağa köre, Rusiye Qara deñizde areketli donanma, deñiz arsenalları ve deñiz bazaları saqlamaq aqqına malik degil edi. Rusiye ayrıca Moldova ve Volos knâzlığına qarşı davalarından vazgeçti. 1856 senesi Parij barışıq anlaşması Rusiye imperiyasınıñ Qara deñiz bölgesindeki tesirini kenişletmege imkânlarını sıñırladı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
