Rusiyede 26 yaşındaki Serğiy Kozlov ve 27 yaşındaki Yevheniya Samoylova qanunsız şekilde mahküm etildi. İşğalciler Keriçli aqay-apaynı «Z ve V timsallerinen maşnanı ateşke berüv»de, em de Qırımda demiryollarını patlatmağa azırlanuvda qabaatlaylar.
Orta küz ayınıñ 15-nde RF Cenübiy bölge arbiy mahkemesiniñ matbuat hızmeti Telegramda bu aqqında haber berdi.
Ruslar Serğiy Kozlovğa sert rejimli müstemlekede 25 yılğa mahküm ettiler, birinci 5 yılını apishanede keçirecek, ve o, 500 000 rublelik (≈260 biñ ğrıvnâ — muar.) para cezasını ödemeli.
Ruslar Yevheniya Samoylovağa umumiy rejimli müstemlekede 17 yılğa mahküm ettiler, o 300 000 rublelik (≈160 biñ ğrıvnâ — muar.) para cezasını ödemeli.
Qabaatlayıcı aqay ve apay içün 28 ve 22 yıllıq apis cezalarını istedi.
Umumen işğalciler aqay ve apaynı üç epizodda ve «terakt, devlet hainligi, terakt azırlığı, partlayıcı maddelerni qanunsız satın alma, saqlav, taşımaq ve yanına aluv» maddeleri boyunca qabaatlaylar.
«2023 s. ilk küz ayınıñ 1-nden 10-nğa qadar Kozlov öz teşebbüsinen Ukrayina Mudafaa nazirliginiñ Baş İstihbarat İdaresiniñ hızmetçisinen alâqağa keçti ve gizli esasta oña partlayıcı vastalarnıñ qısımlarını satın almaqta, taşımaqta, olarnıñ yardımınen Qırım toprağında teroristik areketler yapmaqta, em de bu idareniñ diger vazifelerini yerine ketirmekte yardım etmege razı oldı. Bu devirde Kozlov, Qırımnıñ Keriç şeerinde bulunıp, ayat arqadaşı Samoylovağa Baş İstihbarat İdaresiniñ vazifelerini beraber yerine ketirmegi teklif etti, oña o razı oldı», — dep qayd etildi mahkemeniñ haberinde.
Taqiqatnıñ malümatına köre, maşnanıñ partlatılması, 2023 senesi ort küz ayınıñ 20-nde oldı.
«Kozlov, Baş İstihbarat İdaresiniñ hızmetçisinen alâqada bulunıp, yanğın çıqarğan qol granatasınıñ yapalması ve qullanılması aqqında video-talimatnı ögrenmek, bu elementlerni satın almaq ve olarnıñ yardımınen bu granatanı yapmaq, «Z» ya da «V» timsallerinen maşnalar arasında ücüm obyektini ve onı yaqmaq vaqtını belgilemek vazifesini aldı, ve bunı yaptı. 2023 senesi orta küz ayınıñ 20-nde, evelden yapılğan patlatıcı granatanen Kozlov evelden saylağan maşnanıñ toqtav yerine keldi ve onı yaqtı. Yuqarıda añılğan cinayet areketleri neticesinde maşna yoq etildi, zarar körgenge ehemiyetli maddiy zarar ketirildi», — dep qayd etildi «dava» malümatında.
2024 senesi kiçik ayda ise, işğalli taqiqatnıñ inandırğanına köre, eşler Qara deñiz flotunıñ yardımcı flot hızmetiniñ müdirini közetmege başladılar.
«2024 senesi kiçik aynıñ 8-nde Kozlov yañı vazife aldı — Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda — terciman) bir meskün bina rayonındaki yerni közden keçirmek, Qara deñiz flotunıñ yardımcı flot hızmetiniñ müdiri maşnada bulunğan anda onı patlatıp, terakt plânlaştırmaq. Mahküm etilgenler beraber aile çitfi körünişini yaratıp, közetüv yürsettiler. 2024 senesi kiçik aynıñ 18-nde Kozlov partlayıcı vastalarnı yapmaq, partlayıcı aletler ve partlayıcı maddeler ile areket etüv boyunca bilgi ve ameliy bilgiler aldı. Aynı sene saban ayınıñ 5-nde Kozlov Baş İstihbarat İdaresiniñ hızmetçisinden partlav yapmaq içün vasta ve aletlerniñ bulunğan gizli anbarnıñ yeri aqqında malümat aldı, anda mahküm etilgenler içindekini aldılar ve saqlamağa başladılar, em de terakt yapmaq tarihını — 2024 senesi mayıs ayınıñ 9-nı — belgilediler», — dep qayd etildi haberde.
Daa soñra, taqiqat versiyasına köre, Kozlov ve Samoylova Keriç rayonındaki demiryolda partlav yapmaq kerek ediler.
«Bütün kerekli azırlıqlarnı yapqanda, mahküm etilgenler teraktlarnı amelge keçiremediler, em de Kozlovnıñ eki partlayıcı aletni yapmaq cinayeti soñuna yetmedi, çünki 2024 senesi çeçek ayınıñ 17-nde olarnı FSB hızmetçileri tuttılar», — dep qayd etti mahkeme.
Hatırlatamız ki, Serğiy Kozlov ve Yevheniya Samoylova öz qabaatlarını qısmen tanıdılar.
«Men qabaatımnı bütünley qabul etem», — dep Serğiy Kozlov mahkemeciniñ qabaatını qabul etüv aqqında sualine cevap berdi. Yevheniya Samoylova da qabaatını tanıdı, lâkin onıñ areketleri siyasiy duşmanlıq sebebinden yapılğanınen razı olmağanını qayd etti«, — dep yazdı 2025 senesi ilk küz ayınıñ 18-nde mahkeme salonından "TASS" mühbiri.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
