Rusiyeniñ Rostov-na-Donu şeerindeki Cenübiy bölge arbiy mahkemesi «Hizb ut-Tahrir davası»nıñ dört qız-qadın mabüsiniñ — Nasiba Saidova, Esma Nimetulayeva, Fevziye Osmanova ve Elvize Aliyevanıñ — apis müddetini 2027 senesi saban ayınıñ 28-ne qadar qapalı şekilde uzattı.
Uquq qorçalayıcı Lütfiye Zudiyeva Facebookta bunı bildirdi.
Orta küz ayınıñ 9-nda qız-qadınlar Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) SİZOdan video bağı vastasınen keçirilgen oturışta iştirak ettiler. Mahkeme qarar etken soñ olarnı Simferopol (Aqmescit) şeerindeki 1-nci SİZOtaqiqat izolâtorısından Rostov-na-Donudaki 1-nci SİZOsına avuştırmaq kerekler.
Kelecek mahkeme oturışı orta küz ayınıñ 23-ne belgilendi, amma o, mabüsler Rostov-na-Donuğa ketirilse, keçirilecek, dep qoştı Zudiyeva.
Daa evel Rusiye bu dört qırımtatar qız-qadınını «Aşırıcılıq faaliyetine ya da terrorizmge alâqası olğanları belli olğan teşkilâtlar ve şahıslar cedveli»ne kirsetti. Uquq qorçalayıcılar bunı «siyasiy basqı şekli» olaraq tanıdılar.
Daa evel işğalciler qırımtatar siyasiy mabüsleri Fevziye Osmanova, Elviza Aliyeva, Esma Nimetulayeva ve Nasiba Saidovanı Simferopolnıñ (Aqmescitniñ) 1-nci SİZOğa psihiatrik hastahaneden qaytardılar, anda mecburiy psihiatrik ekspertizanı keçken ediler. Tutuluv aqqında Suspilne Qırımnıñ maqalesinde oquñız.
2025 senesi orta küz ayınıñ 15-nde qırımtatar qadınlarınıñ apiske alınması aqqında ne bilemiz
Orta küz ayınıñ 15-nde saba işğalciler Qırımda dört qırımtatar qadınını tuttılar.
Birinciden Bağçasarayda bir qaç balanıñ anası ve siyasiy mabüs Remzi Nimetulayevniñ apayı Esma Nimetulayeva tutuldı.
Aynı rayonnıñ Holmivka (Zalanköy) köyünde işğalciler bala bağçasında terbiyeci olıp çalışqan pedagogika kolleciniñ studenti Nasiba Saidovanıñ evini tinttiler. Dolınnede (Topçıköyde) quvetçiler Elviza Aliyevanıñ evine kirdiler, Orlivkada (Mamaşayda) ise Fevziye Osmanovanıñ evini tinttiler.
Tutulğanlarnıñ episi Simferopoldaki (Aqmescitteki) FSB idaresiniñ binasına ketirildi ve olarğa Rusiyede yasaq etilgen "Hizb ut-Tahrir" teşkilâtında iştirak etkenleri aqqında madde boyunca şübe bildirildi. Rusiyeniñ "RİA Novosti" devlet agentligi, işğalli FSBge atıf etip, tutulğan qadınlar "Qırım musulmanları arasında dünya halifeliginiñ ideologiyasını tarqatqanı" aqqında bildirdi.
Orta küz ayınıñ 16-nda Qırımnıñ işğalli Kıyiv rayon mahkemesi olarnı eki ayğa apiske aldı. Apiske alınğan qadınlarğa qarşı qorçalayıcı tedbirlerniñ saylanuvı boyunca bütün dört oturış qapalı şekilde keçirildi. Advokat Emil Kurbedinovnıñ aytqanına köre, bütün qadınlar işğal etilgen Simferopoldaki (Aqmescitteki) 1-nci SİZOda tutulacaq. Onıñ malümatına köre, Esma Nimetulayeva işğalciler tarafından Rusiye Ceza qanunnamesiniñ 205.5-nci maddesiniñ 1-inci qısmı (terror teşkilâtınıñ faaliyetini teşkil etüv) boyunca qabaatlana, diger apiske alınğan qadınlar ise aynı maddeniñ 2-nci qısmı (terror teşkilâtında iştirak etüv) boyunca qabaatlanalar.
Esma Nimetulayeva — beş balanıñ anası, 2023 senesi arman ayınıñ 23-nde işğalciler tarafından tutulğan ve Hizb ut-Tahrir davasınıñ beşinci Bağçasaray gruppasınıñ siyasiy mabüsi Remzi Nimetulayevniñ apayıdır.
Nasiba Saidova — pedagogika kolecinde oquğan, bala bağçasınıñ bebek gruppasında çalışqan qız, dep "Qırım birdemligi" bildirdi.
Fevziye Osmanova — tükân hadimi, onıñ evi Bağçasaray rayonınıñ Orlivka köyünde yerleşe.
Elviza Aliyeva Simferopoldaki (Aqmescitteki) fırında kasiyer olıp çalıştı, Qırım federal universitetiniñ dörtünci kursında "Menecment" ihtisasını ala.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, «qanunlarğa qarşı faaliyet»te ve böyle degen «cian hilâfeti»ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
