Yaltada yerli sakinge, 280.4-nci maddege — «Rusiye telükesizligine qarşı faaliyetke açıq çağırıvlar» maddesine binaen üküm çıqarıldı. Bu, işğal etilgen Qırımda bu maddeniñ qullanılğanı ilk belli vaqiadır.
«Tribunal. Qırım epizodı» uquq qorçalayıcı teşebbüsi Telegramda bunı bildirdi.
Qarar arman ayınıñ 25-nde qabul etilgenine baqmadan, ükümniñ tafsilâtları belli olmay qala, dava defterinde ise şimdi de «üküm çıqarılması» statusı qayd etile.
Teşebbüsniñ malümatına köre, mahküm etilgen Qırım sakininiñ adı Ğeorğiy Artamonovdır.
Uquq qorçalayıcılarnıñ qayd etkenlerine köre, RF mahkeme ameliyatı köstere ki, «açıq çağırıvlar» degende, Ukrayinağa qarşı cenk aqqında tefsirler közde tutula, şu cümleden Qırım köprüni yoq etüv zarureti aqqındaki bildirmeler. Aynı zamanda olar Artamonovnıñ açıq çıqışlarını açıq irişimde tapmadılar.
Bundan ğayrı, teşkilâtnıñ malümatına köre, adamnıñ advokatı — Sahalinden bir uquçı, evel işğalli RF Taqiqat eyyetiniñ Qırımdaki idaresinde çalışqan. Davanı «mahkemeci» Hristina Kirilova baqtı. O, «aşırıcılıq» davalarındaki ükümlerinen, şu cümleden ukrayin taraflı nazar noqtası içün taqip etilgen Tetâna Bibik davasınen bellidir.
«Artamonovnıñ qabaatlavınıñ tafsilâtları şimdilik belgilenmegenini közge alsaq, Kirilova mahkemeciniñ dosyesindeki daa bir cinayet aqqında laf etmek erte. Amma er ne olsa, bu malümatlar er alda belgilenir, ve olarğa kerekli uquqiy qıymey kesilecek. Büyük ihtimalnen, umumiy ideologik inançları olğan insanlar gruppasını taqip etkeni içün insanlıqqa qarşı cinayet noqtai-nazarından», — dep bildirdiler uquq qorçalayıcılar.
Evel bu teşebbüs bildirgen edi ki, Soçide Rusiye quvetçileri Qırımnıñ 55 yaşındaki sakinini hırsızladılar, taqiqatnıñ iddiasına köre, pasport tekşerüvinde tutulğan soñ, onı USQe sadaqa bergeni içün «devlet hainligi»nde qabaatladılar. Onı, «itiraf»nı imzalatmaq içün azapladılar. Bundan soñ qadın 15 senege mahküm etildi.
Evel Ukrayina Prezidentiniñ Qırım Muhtar Cumhuriyetindeki Temsilcligi bildirgen edi ki, işğal etilgen Qırımda yarımada sakinlerine qarşı «Rusiye ordusını itibardan tüşürüv» aqqında 1 176 dava qayd etildi. Olarnıñ eñ büyük qısmı — qadınlarğa qarşı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
