Soçide Rusiye quvetçileri, Qırımnıñ 55 yaşındaki sakinini tuttılar, taqiqatnıñ iddiasına köre, pasport tekşerüvinde tutulğan soñ, onı Ukrayina Silâlı Quvetlerine sadaqa yapqanı içün «devlet hainligi»nde qabaatladılar. Onı, «itiraf»nı imzalatmaq içün işkencege oğradılar. Bundan soñ qadın 15 senege mahküm etildi.
«Tribunal. Qırım epizodı» uquq qorçalayıcı teşebbüsi Telegramda bunı bildirdi.
Uquq qorçalayıcılarnıñ malümatına köre, ruslar onı, ukrayin tış pasportında Ukrayinada bulunğanı aqqında malümat tapqan soñ, pasport tekşerüvinde tuttılar. Qadınnı telefonını ve bank qullanmalarını açmağa mecbur ettiler, anda o inkâr etken köçürmelerni taptılar.
Teşebbüs qayd etti ki, o ğayip olğan soñ, onı Rusiyeniñ Voronej vilâyetiniñ Borisoglebsk taqiqat izolâtorında qanunsız şekilde tuttılar, anda oña işkence yapıldı: elektrik aqımnen urdılar, çıplaq alda erkek hızmetçiler ögünde tekşerüvlerden keçirmege mecbur ettiler. Basqı altında o, cinayet yapqanı içün «itiraf»nı imzaladı.
Uquq qorçalayıcılarnıñ malümatına köre, mahküm etilgen Qırımlı qadınnıñ adı Viktoriya Sergeyevadır.
«FSB ögünde öz yaltaqlığınen belli olğan mahkemeci Viktor Zinkov, çoqtan qabaatlanğanlarğa qarşı yapılğan işkence aqqındaki malümatlarnı körmemezlikke urmağa alışqan ve quvetçilerniñ oña köstergen müddetlerini itaatkâr şekilde «çıqara». Halqara Tribunalda qabaatlanğanlar oturağında Viktor Zinkov, oña qarşı qanunsız yolnen alınğan delillerniñ red etilmesine ümüt bağlay bilir. Bugünki künge qadar toplanğan onıñ cenk cinayetleri delilleri, onıñ qabaatını isbatlamaq içün fazlasınen yeterlidir», — dep qayd etildi haberde.
Evel Ukrayina Prezidentiniñ Qırım Muhtar Cumhuriyetindeki Temsilcligi bildirgen edi ki, işğal etilgen Qırımda yarımada sakinlerine qarşı «Rusiye ordusını itibardan tüşürüv» aqqında 1 176 dava qayd etildi. Olarnıñ eñ büyük qısmı — qadınlarğa qarşı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
