Malüm olğanı kibi, Milliy polis qırımtatar halqını sürgün etecegi aqqında "Tatarka" aşhane ağınıñ saibi Volodımır Birükovnıñ Instagramdaki tefsirleri sebebinden duşmanlıq doğurğanına dair cinaiy dava açtı.
Facebookta halq mebusı Tamil Taşeva bunı bildirdi.
"Oleksandr Korniyenkonen beraberlikte bergen muracaatımız neticesinde Milliy polis Ukrayina Ceza qanunnamesiniñ 161-inci maddesiniñ 1-incimilliy, ırqiy ya da diniy duşmanlıqnı qozğatuv, milliy şeref ve itibarnı aşalav, ya da vatandaşlarnıñ diniy işançları sebebinden duyğularını aqaretlev, em de ırqiy, milliy, regional mensüpligi ya da diniy işançlarına köre aqlarınıñ sıñırlanması ya da imtiyazlarnıñ qoyulması qısmına istinaden cinaiy dava açtı, bunıñ çerçivesinde mütenasip izaatlarğa uquqiy qıymet kesilecek. Cemiyetimizde ayırım ve ksenofobiya içün iç bir yer yoq. Biz, er bir insannı, onıñ tamrına baqmadan, ürmet etken esas qıymet olğan uquq ve medeniyet devletini quramız. Aynı zamanda böyle qıymetler deklarativ degil, qanun tarafından semereli şekilde qorçalanmalı", — dep Taşeva yazdı.
"Tatarka. Qırım yemekleri" qavehanesinen qavğa aqqında ne bilemiz
Mayısnıñ 30-nda Zahida Adilova Facebookta qırımtatar mirasınıñ saqlanuvı meselelerine diqqat ayırdı ve Kıyivde, şimdi ise Odesada "Tatarka. Qırım yemekleri" restoranları ağınıñ "qırımtatarlarnıñ temsilciligi" olaraq yerleştirilmesinden raatsızlandı. Qadınnıñ fikirleri em adı, em de domuz etinen bağlı edi.
"Bu qavehaneniñ adı bile — lâqaytlıq ve bilgisizlikniñ ilk işaretidir. Qırımtatar aşları restoranına "tatarka" degen etnonim qoymaq, aqiqiy meksika aşları restoranını açıp, oña "Latinoska" degen kibi bir şey. Bu, şan-şeref içün tamır halqınıñ qadınını taqlit etüvdir. Amma olarnıñ resmiy menüsine baqıñız. Kerçek qırımtatar yemekleri — ince balans, otlarnı bilüv, hamır ve etke sayğıdır. Hususan et aqqında! Qırımtatarlar musulman olğanı içün, şeriat boyunca yasaq etilgen aşayt mallarını qullanmay ediler. Olarnıñ arasında domuz eti de bar. Olar çirkin bir surogatnı yarattılar: bir qazanğa qırımtatar yantıqları ve çibereklerini domuz etinden yapılğan kebabnen qarıştırıp, oña türk yemeklerini qoştılar, tatar köftelerini, Kıyiv köfteleri, avropalı salatlarnı ve bira da qoştılar. Ve buña qırımtatar yemekleri deyler...", — dep Zahida yazdı.
O, iş saiplerini "Qırımtatarlarnıñ gastronomik mirasını aqaretlegeni"nde qabaatladı.
"Qırım tamır halqınıñ qıyın kimligi, olarnıñ baqışlarında, adiy emperyalist ve sovetten soñki stereotiplerine köre, şarqiy, yağlı, şaş ve birağa uyğun bir şeyge çevirildi". Bu, qırımtatar medeniyeti adiy bir qazanç içün parlaq bir perde olaraq hızmet etken gastronomik mirasnıñ açıq-aydın horlamasıdır. Amma paranıñ bir qoqusı yoq, öylemi?", — dep o qoştı.
Daa soñra bu yazı yarım yüz izaat topladı. Qırımtatarlar "Tatarka" qavehanesiniñ Instagramdaki resmiy saifesinde de öz fikirlerini yazdılar. Cevaplarından birinde iş saibi Volodımır Birükov böyle yazdı:
"Bütün halqnı sabırsızlıqnen bekleymiz. Sürgünlikke azırlanıñız", — dep Birükov ayttı.
Böyle telükelerge Qırımtatar Milliy Meclisiniñ reisi Refat Çubarov da cevap berdi.
"Bizler iç bir kimsege qırımtatar halqınıñ genotsid fedalarınıñ hatırasını horlamağa, daa ziyade, onı tekrarlamağa telükege oğratmağa izin bermeycekmiz. Bugün, Qırım — Ukrayina devletiniñ ayırılmaz bir parçası ve tamır qırımtatar halqınıñ vatanı — Rusiye işğali altında bulunğan vaqıt, anda er kün qırımtatarlar ve qavmiy ukrayinler taqip etile, yañı "sürgünlik" qorquzuvları Ukrayina milliy qanunlarına köre, apansız cezalandırılmalı", — dep Çubarov bildirdi.
Bundan soñ Volodımır Birükov açıqtan öz "bağışlav"nı bildirdi.
"Bu gece büyük bir hata yaptım. Bir tefsirimde qırımtatar Niyara Yunusovağa sürgünlik aqqında aytqanda büyük bir hata yaptım. Bu, izaatlarda şahsiy şikâyet edi. Ve bu sözni aytmağa kerekmey edi. Niyarovadan ve bütün qırımtatar halqından bu sözniñ qullanılmasına izin bergenim içün afu soramağa isteyim. Onı bilmeyim, amma aytqan edim. Bu, menim qusurım. Men onı tanıdım. Siz menim dostlarımsıñız. Sizge de, Qırımğa da, Ukrayinağa da men pek dostım. Bu bir daa olmaz. Qardaşlarımdan, qız qardaşlarımdan afu soram, maña kin beslemeñiz", — dep Birükov ayttı.
Şimdi bu vaziyetni uquq qorçalayıcı organları qıymet kesecek.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
