Bir yıl devamında 529 gemi qanunsız olaraq bazı memleketlerniñ bayraqlarını qullanğan edi. Bilgi ve razılıq almadan qullanuv adiseleri Halqara deñiz birleşmesiniñ qırq devlet azası olğan devletlerde qayd etildi. "Qırım reintegratsiyası birleşmesi"niñ mütehassıslar qayd eteler ki, diger bayraqlarnıñ qullanılması Rusiyeniñ "kölge flotu"nıñ esas hususiyetidir.
ARC öz saytında bunı bildirdi.
"Evelden bizler IMOthe International Maritime Organization ve halqara vekâletli organlarğa, em de demokratik devletlerniñ mütenasip organlarına, Qırım "kruing şirketleri", global ekipaj ve gemilerniñ saiplerini saylav teşkilâtlarınıñ qanunsız faaliyetinen bağlı Rusiye tankerlerinen bağlı qanunsız areketler aqqında bildirgen edik. Bundan da ğayrı, Avropa devletlerinde Rusiye neft şirketleriniñ izleri tapılğanı, "Volgoneft" tankerlerinen bağlı telükeler, Rusiye arbiy hızmetçileriniñ tankerlerniñ "ekipaj azaları" rolünde iştirak etkenleri ve Rusiyeniñ kontrol etkeni neft terminallarınıñ meseleleri aqqında haber etile edi", — dep ARC yazdı.
Hatırlatamız ki, çiçek ayınıñ 27-nde SeaKrime leyhasınıñ jurnalisti Katerına Yaresko, işğal etilgen Qırımdan sahte vesiqalarnen aşayt malını yüklegen Sofia gemisi Kavkaz limanına kelgenini bildirdi.
"Çiçek ayınıñ 26-nda yük gemisi Kavkaz limanına kelip, 10 biñ tonna boğdaynı yükleme gemisine berildi. Soñra, er angi bir memleketke ketire bilecek gemilerge yüklenip ketirilecek. Vesiqalar sahte — olarnıñ yükleme portı yoq", — dep haberde qayd etildi.
Hatırlatamız ki, Prezident Volodımır Zelenskıy bildirdi ki, Ukrayina, istihbarat malümatına esaslanıp, hırsızlanğan ukrayin ububatını satuvnen alâqası olğanlarğa nisbeten munasip sanktsiyalar paketini azırlay.
Zelenskıy içtimaiy ağlarda, Rusiyeniñ İsrailde hırsızlanğan ukrayin ububatınen bağlı vaziyetni izaatlap, bunı bildirdi.
O şunı bildirdi ki, "her bir normal memlekette hırsızlanğan şeyni elde etmek uquqiy ceetten mesüliyetli bir areket ola". Bu, hususan, Rusiye tarafından hırsızlanğan ububatqa aittir, dep prezident qoştı.
"Böyle bir gemilerniñ daa biri İsrail limanına keldi ve yüküni çıqarmağa azırlana. Bu temiz bir iş degil ve olamaz. İsrail akimiyeti memleketniñ limanlarına qaysı gemiler ve qaysı yüknen kelgenini bilmey olamaz", — dep Zelenskıy qayd etti.
Onıñ aytqanına köre, Rusiye vaqtınca işğal etilgen ukrayin topraqlarından muntazam sürette ubuat alıp kete ve işğalli Rusiye organlarınen bağlı şahıslar tarafından böyle ububatnıñ çıqarılmasını teşkil ete. Onıñ aytqanına köre, böyle areketler İsrail devletiniñ qanunlarını boza.
"Ukrayina böyle adiselerge yol bermemek içün diplomatik kanallar vastasınen bütün kerekli adımlarnı atqan edi. Amma, körgenimiz kibi, daa bir gemi toqtatılmadı", — dep prezident qayd etti.
Zelenskıy şunı da bildirdi ki, Ukrayina Tış işler nazirligine devletimizniñ bütün ortaqlarını vaziyet aqqında haberdar etmege avale etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
