İşğal etilgen Ukrayina topraqlarından, hususan Qırımdan, ububatnen yüklengen eki gemi "Barıştıtıcı" Merkeziniñ SeaKrime leyhasınıñ mütehassısları tarafından qayd etildi. Biri, MİHAİL NENASHEV, Bosforğa doğru yol ala. Digeri Kavkaz limanına keldi.
SeaKrime leyhasınıñ jurnalisti Katerına Yaresko bunı bildirdi.
"MİHAİL NENASHEV (IMO: 9515539). Geminiñ maqsadı İskenderiye (Mısır) limanı ola, lâkin adetince Suriyege kete. Yüklenüv — 27 400 tonnalıq boğday, 22–25.04.2026 Avlita ububat terminalında. 19–22.04 künleri o, 20-nci iskelede, ububat terminalınıñ qarşısında tura edi. İhracatçı — "Pallada" (IPN: 6161095847). Zaporijjâ, Herson vilâyetleri ve Qırım Muhtar Cumhuriyetiniñ işğal etilgen topraqlarından kelgen ububttır", — dep o yazdı.
Başqa SOFIA gemisi (IMO: 9245263) çiçek ayınıñ 19-nda işğal etilgen Feodosiyada (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adde) yüklendi. Kavkaz limanına çiçek ayınıñ 26-nda keldi.
"Bir yük balkerine 10 biñ tonna boğday ketirildi. Soñra ise, er angi bir memleketke ketire bilecek gemilerge yüklenir. Vesiqalar sahte, olarnıñ yükleme portları yoq. Rusiye istilâcısından ububat satın alğan er kes hırsızlanğan ububat ala bile", — dep Yaresko ayttı.
Hatırlatamız ki, Tış işler naziri Andriy Sıbiğa, Rusiye ABINSK (IMO: 9303869) quru yük gemisiniñ 43 biñ tonna hırsızlanğan boğdaynen Hayfa limanına kirgenini haber alğan soñ, İsrail diplomatik hızmetiniñ yolbaşçısı Gideon Saarğa telefon etti. Ukryaina naziri X içtimaiy ağında bu aqqında yazdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
