Kıyivniñ Dnipro rayonında Yuriy Şumskıy soqağındaki meydannı Qırımdan Ukrayina Qaramanı Svâtoslav Aleksapolskıynıñ şerefine adlandırdılar.
Mütenasip qararnı Kıyiv şurası qabul etti, dep çiçek ayınıñ 23-nde Facebookta Qırım ukrayinleri bölge şurasınıñ vekili Andriy İvanets haber berdi.
"Aleksapolskıy Simferopolnıñ (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adniñ — terciman) "Tavriya" taqımınıñ ultrası edi, 2014 senesi Qırım evromaydancılarını tituşkalardan qorçalağan edi. Daa soñra "Azov" ve DŞVde hızmet etti. 2022 senesi Şimaliy Kıyiv vilâyetini işğalli ordulardan temizledi. Ne yazıq ki, 2022 senesi arman ayında Mıkolayiv vilâyetinde elâk oldı. Qırım sakini 33 yaşında edi", — dep qayd etti o.
2023 senesi Ukrayina prezidenti Volodımır Zelenskıy oña "Altın Yıldız" nişanınen Ukrayina Qaramanı unvanını berdi.
"O, kerçekten de eñ yahşılardan biri edi, çünki pek israrlı edi, pek ögrenilgen edi. Birinci kursdan soñ o, Amerikağa Work and Travel programması boyunca ketti. Ekinci kurstan soñ kimsege muracaat etmeden, ekinci kursqa keçti ve müddetli arbiy hızmetke ketti. O dedi: "Anam, Rusiye ile cenk olacaq, ve silânı nasıl tutmaq kerek olğanını bilmek kerek", — dep 2023 senesi Suspilne Qırımğa onıñ anası Lüdmıla Aleksapolska tarif etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
