Kıyivniñ Dnipro rayonında Yuriy Şumskıy soqağındaki meydannı Qırımdan Ukrayina Qaramanı Svâtoslav Aleksapolskıy adına adlandırmağa teklif eteler. Bu sorav "Kyiv Digital" hızmetinde peyda oldı.
Qırımtatar Resurs Merkezi (QRM) bunı bildirdi.
KŞDMniñ malümatına köre, ilk küz ayınıñ 16-nda keçirilgen soravda iştirak etken 10,4 biñ insandan 80%-den çoqusı böyle teşebbüsni destekledi.
"Svâtoslav Aleksapolskıy ("Svit") Qırımnıñ cemaat ayatınıñ iştirakçisi edi, şu cümleden "Yevromaydan-Qırım" iştirakçilerini qorçalağan edi. O, 2022 senesi arman ayında Mıkolayiv vilâyetinde duşman noqtalarına ücüm etkende qardaşlarını qurtarıp elâk oldı", — dep QRM yazdı.
2023 senesi Prezidentniñ Fermanınen Svâtoslav Aleksapolskıyğa "Altın Yıldız" nişanınen Ukrayina Qaramanı unvanı ölümden soñ berildi.
"O, kerçekten de eñ yahşılardan biri edi, çünki pek israrlı edi, pek ögrenilgen edi. Birinci kurstan soñ o, Amerikağa Work and Travel programması boyunca ketti. Ekinci kurstan soñ, kimsege muracaat etmeden, ğıyabiy oquvğa keçti ve müddetli hızmetke ketti. O şunı dedi: "Anam, Rusiyenen cenk olacaq, ve silânı nasıl tutmaq kerek olğanını bilmek kerek", — dep o, 2023 senesi "Suspilne. Qırım"ğa onıñ anası Lüdmıla Aleksapolska ayttı.
Yarımadada Ukrayina tarafdarı olaraq belli — "Tavriya" futbol klubınıñ ultrası, Qırım Yevromaydanınıñ faal iştirakçisi. Svâtoslav Alekspolskıy ukrayin tarafdarı olğan nazar noqtasını atta Rusiye işğali vaqtında bile gizlemedi.
"Bir kere Simferopoldaki Merkeziy çarşıdan trolleybusnen ketkende, ekranda daima bir reklama bar edi. Bir kere közümni köterip baqsam, üçer safta doquz fotoresim körem. Birinci sırada, ortada, Svâtnıñ fotoresimi bar, "Svâtoslav Aleksapolskıy" imzasınen. Klipniñ arqasında bir ses barbarlar, terroristler ve ilâhre dep ayta", — dep Svßtoslavnıñ anası hatırladı.
2014 senesinden soñ Svâtoslav Qırımnı terk etti, ukrayin arbiy bölüklerinde hızmet etti. 2020 senesi Svâtoslav Aleksapolskıy askerlikten boşatıldı. İT saasında çalışmağa ketti, lâkin 2022 senesi kiçik aynıñ 24-nde memleket qorçalamağa qayttı.
"O, Qırım yigitlerini topladı — ve olar TROğa yazıldılar. Kıyiv civarında er şey sakinleşkende, çiçek ayında olar Odesağa kettiler, çünki anda Mıkolayiv, Herson, Odesa ve Qırım brigadaları teşkil etilgen edi. O, oğlanlarınen beraber Ukrayina cenübini ve, elbette, Qırımnı azat etmek içün ketti", — dep mudafaacınıñ anası tarif etti.
Svâtoslav Qırımnıñ da azat etilecegine inanğan edi. Soñki intervyularından birinde o, yarımadanıñ işğalden qurtarıluvını nasıl körgenini tarif etti:
"Eger bizimz yeterli küçümiz ve paramız olsa ve biz Canköyniñ sıñırlarına çıqsaq, eminim ki, o vaqıt köpür alâ daa tursa, 2014 senesinden soñ kelgen er kes bu köpürden Rusiyege pek tez qaytıp olur. Özlerini tamır Qırım sakinleri olaraq tanığan yoldaşlar ise, bizni beklegenlerini ve qaytacağımız ne qadar güzel olğanını aytacaqlar. Eñ yaramay taqdirde halq sessiz qalacaq", — dep intervyuda 2022 senesi oraq ayınıñ 11-nde Ukrayina Qaramanı Svâtoslav Aleksapolskıy tarif etti
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
