İşğalciler, er yıl Qırımğa 5-7 biñ Rusiye qorantası köçip, ealiniñ eksilüvini toqtatmaq içün kelgenini bildirdiler.
Qırım Devlet şurasınıñ işğalli reisi Vladimir Konstantinov TASS agentligine bergen intervyusında bunı añlattı.
"Er yıl 5-7 biñ qoranta yarımadada yaşamağa qara bere. Bu aqım sayesinde, ilk sefer, ealiniñ köçüvi toqtatıldı, lâkin tabiatnıñ tertibine köre, ölüm sayısı doğuv sayısından çoq", — dep o ayttı.
Yarımadada doğuv seviyesi alçaq olğanını Konstantinov, gençlerniñ diger prioritetleri olğanınen añlattı.
Hatırlatamız ki, Ukrayina prezidentiniñ Qırımdaki temsilciliginiñ malümatına köre, 2014 senesinden başlap Rusiye yarımadağa bir millionğa yaqın vatandaşını köçürdi. Ukrayina vatandaşlarını ruslarnen deñiştirüv siyaseti — müstemlekeleştirüv usullarından biridir. Ruslarnı iş yerleri, ucuz evler ya da ipotekalar, topraq damartılarınen celp eteler.
2025 senesi boş ayda Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) rabini Binyamin Volf, Ğarbiy Avropadan kelgen yeudilerni işğal etilgen Qırımğa köçmege çağırdı, "raat ayat ve lâyıq qazanç" vade etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
