Qırımdaki işğalciler ealini deñiştirüv siyasetini devam ete. Böyle bir fikirni "Qırımtatar resurs merkezi" Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) rabini Binyamin Volfnıñ, Ğarbiy Avropadan kelgen yeudilerge işğal etilgen Qırımğa köçmege ve "rahat ayat ve kelişken para qazanmağa" çağırdığı beyanatına izaatladı.
QRM öz saytında bu aqqında haber etti.
"Volfnıñ aytqanına köre, Rusiye yeudiyler içün rahat bir yer oldı, Sevastopol (Aqyar) ise — yeudiy ananelerine ürmet köstergen bir şeerdir. Onıñ qayd etkenine köre, o, Qırımda endi 20 yıldan ziyade yaşay, lâkin soñki 10 yıl devamında — Rusiye işğali başlağan soñ — akimiyetniñ yeudiy cemiyetine nisbeten ürmetini duydı. Onıñ aytqanına köre, antisemitizmniñ er angi numayışları sert bir şekilde toqtatıla, şeerde ise Sevastopolniñ (Aqyarnıñ) merkezinde yeudiy bayramlarını raatlıqnen qayd etmek mümkün", — dep haberde aytıla.
Rabin, dep yaza QRM, Sevastopolniñ (Aqyarnıñ) işğalci gubernatorı Mıhaylo Razvojayev ile körüşkenini ve oña "şeerge yeudiy yatırımcılarnı kirsetmege" teklif etkenini bildirdi.
"Qırımtatar resurs merkeziniñ" ekspertleriniñ qayd etkenine köre, böyle beyanatlar Rusiye Federatsiyasınıñ işğal etilgen yarımadada ealini deñiştirüv siyasetiniñ bir parçasıdır.
"Rusiye Qırımnıñ demografik terkibini deñiştirüv strategiyasını ardı-sıra ömürge keçire, anda rusiyeli vatandaşlarnı yerleştire ve diger memleketlerden köçüvni teşviq ete", — dep haberde aytıla.
Hatırlatamız, Ukrayina prezidentiniñ Qırımdaki temsilciliginiñ malümatına köre, 2014 senesinden başlap Rusiye yarımadağa bir millionğa yaqın vatandaşını köçürdi. Ukrayina vatandaşlarını ruslarğa deñiştirüv siyaseti — müstemlekeleştirüv usullarından biridir. Rusiyelilerni iş yerleri, ucuz evler ya da ipotekalar, topraq ayırmaları ile celp eteler.
Читати ще
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
