Saban ayınıñ 12-nde aqşamdan başlap ve sabna ayınıñ 13-nde gece devamında işğal etilgen Qırım ve Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) patlavlar oldı, Rusiye ava mudafaası çalıştı. RF Mudafaa nazirligi gece yarımada üzerinde 80 dron urulğanını bildirdi. Şaatlarnıñ bildirgenine köre, patlavlar Tavriya elektrik stantsiyası ve Fiolent burnu yanında "Pantsir-S1" zenit raketa-top kompleksiniñ (ZRTK) yerleri yanında oldı. Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) rayonınıñ bir qaç meskün yerinde elektrik kesildi.
RF Mudafaa nazirliginiñ bildirgenine köre, gece Qırım üzerinde Rusiye AMS 80 uçucısız uçaq aletini urdı, 18-i — Azaq deñizi, ekisi — Qara deñiz üzerinde. Saban ayınıñ 12-nde saat 19:00-dan itibaren daa dört dronnı urıp tüşürdiler.
"Bütün gece AMS quvetleri ve Qara deñiz flotunıñ quvetleri USQniñ ücümini toqtata ediler. Bu, Sevastopolda (Aqyarda) soñki vaqıtları eñ uzun devam etken ücümlerden biri edi. Umumen 53 dron tüşürildi. Qayd etemiz ki, yaralanğanlar olmadı", — dep Telegramda işğalli Sevastopol (Aqyar) gubernatorı Mihail Razvojayev yazdı.
Onıñ malümatına köre, Aşağı Gollandiya rayonında çoq qatlı evlerniñ birisinde patlav dalğası pencerelerniñ camlarını qırdı, dronnıñ yıqılğan parçaları ise garajnı yandırdı.
Razvojayevniñ malümatına köre, General Ostrâkovdaki evlerden biriniñ damını dronnıñ parçaları urdı.
Aynı zamanda, o iddia ete ki, Zolotoy plâj rayonında, dağ-ormanlı yerde, tüşürilgen UUA 1,5 biñ kvadrat metrlik ormanda yanğın çıqardı. Berman balkasında da bir yerge yıqıntı tüşti, ot yandı.
"Monastırskaya şossesi rayonında BC (bağçılıq cemiyeti) territoriyasında şahsiy evlerniñ birinde evniñ damı bozulğan. Fiolent şossesi rayonında BCniñ birinde urulğan UUAniñ parçası pencere qırıldı", — dep "gubernator" qoştı.
"Ateş" arbiy-partizan areketiniñ agentleri qayd eteler ki, Fiolent burnundaki S-400 zenit raketa-top kompleksiniñ noqtası yanında gece bir qaç dron bar edi.
Şaatlarnıñ aytqanına köre, gece Fiolent burnunda yerleşken 12-nci zenit-raketa polkunıñ mevamındaki "Pantsir-S1" ZRTK tüşti.
"Pantsir"niñ ücüm etmek imkânı yoq. O zarar körgen soñ Rusiye arbiy hızmetçileri UUAniñ ücümini küçük atış silâsı yardımınen toqtatmağa tırıştı", — dep haberde qayd etildi.
Yerli sakinler kanalğa "Qaçı" ava limanı rayonında "küçlü patlav", Tavriya SES rayonında "küçlü patlav", 810-ıncı deñiz piyade brigadası yerleşken Sevastopolnıñ (Aqyarnıñ) Kozaça körfezi rayonında arbiy mudafaa bölüginiñ işi aqqında bildirdiler.
Şaatlarnıñ bildirgenine köre, "Belbek" ava limanında "pek küçlü patlav" eşitildi, ondan evler titredi, maşinalarda telükesizlik sisteması çalıştırıldı, Bağçasaraydaki arbiy bölükniñ rayonında patlav qayd etildi.
Bundan ğayrı, Simferopol (Aqmescit) rayonınıñ bazı meskün yerlerinde elektrik yoq, Tavriya SES yanında yol qapatıldı. Yerli sakinlerniñ fikrince, stantsiya ücüm etilgen edi.
Ukrayina mudafaa quvetleri soñki vaqıtları vaqtınca işğal etilgen Qırımda Rusiye arbiy obyektlerine ücümlerini quvetleştirdi. İşğalcilerniñ ava mudafaası sistemaları, radiolokatsiya stantsiyaları, dronları ve diger tehnikası zarar kördi.
"Evelleri bu tek-tek noqta ücümleri edi, bizler quvandıq, şimdi ise olar kerçekten de sistematik oldılar ve bizler üç qat quvandıq. Çünki bizim komandanlığımıznıñ doğrudan-doğru insansız sistemaları işğal etilgen topraqlardaki maqsatlarğa ücüm etüv esnasını konveyerge qoydı, yani, bir kün de olsa, maqsatlarğa ücüm etilmey", — dep UHHniñ sabıq hadimi ve arbiy mütehassıs İvan Stupak tarif etti.
Onıñ aytqanına köre, ukrayin arbiy hızmetçileri ne qadar çoq çeşit ve paalı obyektlerge ücüm etse, Rusiyege öz qabiliyetini ğayrıdan tiklemek o qadar qıyın olur. Stupak şunı da qayd etti ki, böyle ücümlerniñ doğrulığı ukrayin istihbaratınıñ semereli çalışqanını ve yarımadada malümat menbalarınıñ bulunğanını köstere.
Hatırlatamız ki, işğal etilgen Sevastopolda (Aqyarda) Ukrayina Silâlı quvetleriniñ mahsus operatsiyalar quvetleri S-300 ve S-400 Rusiye zenit-raketa kompleksleriniñ "közleri" olğan 64N6E radiolokatsiya stantsiyasını ve onıñ antenasını yoq etti.
USQniñ İnsansız sistemalar quvetleriniñ komandanı Robert ("Madâr") Brovdi bildirdi ki, saban ayınıñ 10-nda işğal etilgen Qırımdaki "Azovska" neft bazasında "Ptahı Madâra" 414-nci ayrı brigadası avtosaqalarğa ve Canköy neft bazasına ücüm etti.
Saban ayınıñ 10-ncı aqşamı ve saban ayınıñ 11-nci gecesi işğal etilgen Qırımda rusiye ava mudafaası çalışa edi, dep RF Mudafaa nazirligi ve Sevastopol (Aqyar) şeeri ''akimiyeti'' bildirdi. Şaatlar patlamalar ve qubbe altındaki radiolokatsiya stantsiyası (RLS) ve "Pantsir-S2" zenit raketa-top kompleksiniñ yerleşkeni Fiolent burnundaki 12-nci zenit-raketa polkunıñ divizionı yanına bir qaç ücüm aqqında bildirdiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
