RF Mudafaa nazirligi, saban ayınıñ 11-nde ve sabannıñ 12-ne keçer gecesi işğal etilgen Qırım üzerinde 35 uçucısız uçaq aleti tüşürilgenini bildirdi. Daa 17 UUA Rusiye ava mudafaası tarafından Qara ve Azaq deñizleri üzerinde yoq etildi.
RF Mudafaa nazirligi Telegramda bunı bildirdi.
Umumen, bir gecede Rusiye Federatsiyası ve Qırım üzerinde 80 dron tüşürildi, dep Mudafaa nazirligi bildirdi. Hususan, 14-ü — yarımadanıñ üzerinde, sekizi — Qara deñizniñ üzerinde, ekisi ise Azaq deñiziniñ üzerinde.
Aynı zamanda Kıyiv vaqtına köre saat 13:00-ten 19:00-ğa qadar 53 uçuşsız uçaq aleti, 21-i — Qırım ve daa yedisi — Qara deñiz üzerinde tüşürildi.
Ukrayina mudafaa quvetleri soñki vaqıtları vaqtınca işğal etilgen Qırımda Rusiye arbiy obyektlerine ücümlerini quvetleştirdi. İşğalcilerniñ ava mudafaası sistemaları, radiolokatsiya stantsiyaları, dronları ve diger tehnikası zarar kördi.
"Evelleri bu tek-tek noqta ücümleri edi, bizler quvandıq, şimdi ise olar kerçekten de sistematik oldılar ve bizler üç qat quvandıq. Çünki bizim komandanlığımıznıñ doğrudan-doğru insansız sistemaları işğal etilgen topraqlardaki maqsatlarğa ücüm etüv esnasını konveyerge qoydı, yani, bir kün de olsa, maqsatlarğa ücüm etilmey", — dep UHHniñ sabıq hadimi ve arbiy mütehassıs İvan Stupak tarif etti.
Onıñ aytqanına köre, ukrayin arbiy hızmetçileri ne qadar çoq çeşit ve paalı obyektlerge ücüm etse, Rusiyege öz qabiliyetini ğayrıdan tiklemek o qadar qıyın olur. Stupak şunı da qayd etti ki, böyle ücümlerniñ doğrulığı ukrayin istihbaratınıñ semereli çalışqanını ve yarımadada malümat menbalarınıñ bulunğanını köstere.
Hatırlatamız ki, işğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) Ukrayina Silâlı quvetleriniñ mahsus operatsiyalar quvetleri S-300 ve S-400 Rusiye zenit-raketa kompleksleriniñ "közleri" olğan 64N6E radiolokatsiya stantsiyasını ve onıñ antenasını yoq etti.
USQniñ İnsansız sistemalar quvetleriniñ komandanı Robert ("Madâr") Brovdi bildirdi ki, saban ayınıñ 10-nda işğal etilgen Qırımdaki "Azovska" neft bazasında "Ptahı Madâra" 414-nci ayrı brigadası avtosaqalarğa ve Canköy neft bazasına ücüm etti.
Saban ayınıñ 10-ncı aqşamı ve saban ayınıñ 11-nci gecesi işğal etilgen Qırımda rusiye ava mudafaası çalışa edi, dep RF Mudafaa nazirligi ve Sevastopol (Aqyar) şeeri ''akimiyeti'' bildirdi. Şaatlar patlamalar ve qubbe altındaki radiolokatsiya stantsiyası (RLS) ve "Pantsir-S2" zenit raketa-top kompleksiniñ yerleşkeni Fiolent burnundaki 12-nci zenit-raketa polkunıñ divizionı yanına bir qaç ücüm aqqında bildirdiler.
Daa evel USQniñ StratKomınıñ bildirgenine köre, saban ayınıñ 9-nda gece işğal etilgen Qırımda USQniñ Mudafaa quvetleri AMSnıñ S-300 radiolokatsiya stantsiyasına ücüm etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
